Kurti: LDK përbuzi çdo ofertë që ia bëmë
Kryeministri i Kosovës, Albin Kurti, kritikoi Lidhjen Demokratike të Kosovës për, siç tha, “përbuzje të ofertave” për marrëveshje politike.
Ai këtë e tha në fjalimin që ai po e mban në seancën e Kuvendit, të thirrur për të bërë diskutim lidhur me zgjedhjen e Presidentit.
Në këtë seancë të bojkotuar nga opozita, Kurti tha se partitë opozitare kanë bërë bllokada të njëpasnjëshme institucionale për ta “dëmtuar fituesin e zgjedhjeve”.
“Marrëveshje politike dhe kompromisi për koalicion qeverisës është gjëja më normale... Kompromisi nuk është pazar për të rehatuar figura politike”, tha ai.
Ai shtoi se në marrëveshje politike duhet pasur parasysh dallimet në peshën elektorale, gjegjësisht votave që ka secila parti.
Më 25 prill, LVV-ja iu ofroi partive opozitare, gjegjësisht PDK-së dhe LDK-së kohë deri të dielën t’i paraqesin së bashku tre kandidatë jopartiakë për presidentin e ardhshëm të Kosovës.
Këto parti ndërkohë e kanë akuzuar LVV-në dhe Kurtin se po bëjnë propagandë dhe show edhe në thirrjen e kësaj seance për diskutim.
Haxhiu: Mungesa e opozitës shtyn vendin drejt një krize të panevojshme
Kryetarja e Kuvendit të Kosovës, Albulena Haxhiu, tha se mungesa e opozitës në seancën për çështjen e presidentit, prodhon pasoja: “e bllokon një procedurë kushtetuese dhe e shtyn vendin drejt një krize të panevojshme”.
Ajo tha se pas seancës së 5 marsit – që u ndërpre në mungesë kuorumi – iu drejtua Gjykatës Kushtetuese, duke shtuar se Gjykata tha se për pjesëmarrjen e deputetëve në seanca vetëm se ka vendosur paraprakisht.
“Përgjigja ishte e qartë, kjo çështje është vendosur njëherë. Nuk ka hapësirë për shmangie nga ky detyrim”, tha Haxhiu.
“Deputetët janë të obliguar që të jenë të pranishëm dhe të votojnë, përveç kur kanë marrë leje paraprake”, theksoi ajo.
Ajo tha se nuk pretendon t’ua ndryshojë qëndrimin partive opozitare, por sipas saj, qytetarët presin që deputetët të marrin pjesë në procesin për zgjedhjen e presidentit.
Nis seanca, opozita s'merr pjesë
Në Kuvendin e Kosovës ka nisur seanca e jashtëzakonshme për diskutimin për çështjen e presidentit.
Në seancë nuk janë të pranishëm deputetë të partive opozitare.
Çitaku e cilëson “hajgare” kërkesën për diskutim për zgjedhjen e presidentit
Nënkryetarja e PDK-së, Vlora Çitaku, e cilësoi si “hajgare” thirrjen e seancës nga LVV-ja për të diskutuar për çështjen e presidentit.
“Nuk kemi nevojë të diskutojmë nëse Kosova ka nevojë për president apo jo. Kjo është çështje kushtetuese dhe shtetërore, jo temë improvizimi. PDK ka qenë e qartë që nga dita e parë dhe ka ofruar opsione konkrete për zgjidhje”, shkroi ajo në Facebook.
Çitaku e akuzoi LVV-në se nuk e ka trajtuar me seriozitet procesin e zgjedhjes së presidentit, duke theksuar se partia e kryeministrit Albin Kurti “nuk kërkon konsensus, por prodhon krizë”.
