Lushaku Sadriu: Pamje e keqe e Kuvendit
Pas seancës, deputetja e LDK-së, Jeohna Lushaku Sadriu, e cilësoi si “pamje të keqe” atë që ndodhi në Kuvend.
Ajo tha se deputetët duhet ta konstituojnë Kuvendin, duke e fajësuar LVV-në për papërgjegjësi që ta kryejë detyrën e saj.
Tani, edhe anëtarë të partive të tjera po deklarohen për mediat pas ndërprerjes së seancës.
Tahiri i PDK-së: LVV po prodhon krizë politike
Arian Tahiri i PDK-së tha se dita e sotme nuk është e mirë për Kosovën. Ai tha se mbrëmë është cenuar “rëndë rendi kushtetues”.
“LVV ka vota për ta zgjedhur kryetarin [e Kuvendit]. Ata refuzojnë të propozojnë emër dhe provojnë që të prodhojnë krizë politike”, tha ai.
Basha: Kurti i fton për diskutim për marrëveshje, këta e sulmojnë
Dimal Basha, deputet i LVV-së, tha se Albin Kurti i fton partitë për diskutime që të arrihet një marrëveshje, ndërkaq “këta sulmojnë e ofendojnë”.
“Edhe kush? Këta që Radoiçiqin e pritshin në kryeministri e Listën Serbe e mbanin në Qeveri”, shkroi ai në Facebook, duke iu referuar një takimi vite më pas në Qeveri mes kryeministrit të atëhershëm të Kosovës, Ramush Haradinaj, nga Aleanca, me ish-nënkryetarin e Listës Serbe, Millan Radoiçiq.
Radoiçiq kërkohet nga Kosova për sulmin e armatosur në Banjskë më 2023 dhe për krime lufte në Gjakovë.
Hoxhaj: LVV duhet ta propozojë kryeparlamentarin
Enver Hoxhaj nga PDK, tha se LVV-ja duhet ta propozojë kandidadin për kryeparlamentar dhe të konstituohet Kuvendi, ndonëse e vlerësoi seancën si antikushtetuese.
Sipas tij, procesi i konstituimit nuk është i lidhur me krijimin e Qeverisë dhe zgjedhjen e presidentit.
Hoxhaj u shpreh seanca e sotme ishte “seancë e turpit”. Ai e akuzoi Kurtin për “uzurpim” të pushtetit dhe “suspendim të të gjitha institucioneve demokratike”.
Deputeti i PDK-së tha se gjithë kjo situatë është që vendi të shkojë sërish në zgjedhje.
