Me hedhje vezësh e tensione, Kuvendi në pikën zero

Kreu i LVV-së, Albin Kurti, tha se ndonëse i kanë votat për të votuar një kryeparlamentar të ri, çfarëdo konstituimi i organit ligjvënës, pa një marrëveshje që garanton edhe zgjedhjen e presidentit, “pashmangshëm na shpie në zgjedhje të reja”.

“Andaj insistimi ynë i drejtë është që të ulemi, të bisedojmë, të merremi vesh dhe vetëm nga lartësia e një marrëveshjeje politike dhe nga gjerësia e një marrëveshje mes meje dhe liderët e partive të tjera parlamentare, të konstituojmë Kuvendin, Qeverinë dhe ta zgjedhim presidentin”, tha ai, pas seancës konstituive.

Ai sërish u bëri thirrje udhëheqësve partiakë që të takohen për të arritur një marrëveshje. Kurti u shpreh se nuk dëshiron që në një seancë për presidentin të marrin pjesë vetëm deputetët e LVV-së dhe të komuniteteve joserbe.

I pyetur për incidentin me deputeten e Aleancës, që hodhi vezë në drejtim të tij, Kurti tha se nëse gjuajtja me vezë drejt sakos dhe pantollonave të tij është çmimi që duhet të paguajë në mënyrë që udhëheqësit politikë të dialogojnë për të arritur një marrëveshje, ai është i lumtur ta paguajë një çmim të tillë.

“Unë nuk ankohem që ata hedhin vezë, ankohem që ata nuk dialogojnë”, tha ai.

Ai foli edhe për çështjen e presidentit, duke përsëritur qëndrimin se ai duhet të jetë një figurë mbipartiake, jashtë aktualitetit politik.

Marrëveshja politike, sipas tij, duhet të reflektojë edhe rezultatin zgjedhor.

Vazhdimi i seancës konstituive nisi me 1 orë vonesë, por zgjati vetëm disa minuta. Megjithatë, ato pak minuta u përcollën me tensione, pasi kreu i LVV-së, Albin Kurti, doli në foltore.

Kurti nuk propozoi emër për kryeparlamentar, por kërkoi kohë shtesë për marrëveshje politike.

Me t’u kthyer në ulësen e tij në mes të sallës, deputetja e Aleancës, Time Kadrijaj, iu afrua Kurtit dhe hodhi vezë në drejtim të tij, duke bërë që kryesuesi i seancë të shtynte punimet e Kuvendit.

Më poshtë ju sjellim disa fotografi që pasqyrojnë tensionet e sotme në Kuvend, të realizuara nga agjencia Reuters:

Ambasada britanike tha se në dy vjetët e fundit, për një kohë të gjatë Kosova ka qenë pa një Kuvend funksional, duke theksuar se funksionalizimi i organit ligjvënës është përgjegjësi e politikanëve të Kosovës e jo e sistemit.

“Ata duhet urgjentisht të punojnë së bashku për ta zgjidhur këtë situatë përmes dialogut dhe negociatave paqësore, në të mirë të qytetarëve të Kosovës dhe partneriteteve të saj ndërkombëtare”, u tha në reagimin e Ambasadës të publikuar në rrjetet sociale.