Të shtunën (30 tetor) në Kosovë janë regjistruar edhe 25 raste të reja me koronavirusin e ri, që e shkakton sëmundjen COVID-19.
Në njoftimin e Ministrisë së Shëndetësisë në Kosovë bëhet e ditur se kjo shifër ka dalë pas testimit të 1.801 mostrave.
Nga sëmundja janë shëruar edhe 9 pacientë ndërsa raste aktive janë 447.
Të shtunën nuk është regjistruar asnjë rast i vdekjes. Që nga muaji mars i vitit 2020 nga sëmundja kanë vdekur 2.976 persona. Shifra bazohet në të dhënat zyrtare.
Më herët Shërbimi Klinik dhe Universitar i Kosovës njoftoi se në spitale dhe klinika po trajtohen 69 pacientë me COVID-19.
“Prej tyre 32 me oksigjeno-terapi dhe 4 në mjekim intensiv, në gjendje të rënduar shëndetësore”, thuhet në njoftim.
Vaksinimi kundër koronavirusit në Kosovë ka filluar në mars të këtij viti ndërsa deri të shtunën janë vaksinuar me dozën e dytë mbi 720.000 qytetarë.
Gjithsej janë administruar mbi 1.5 milion vaksina.
