Ndërlidhjet

Policia posedon urdhërarrestin e gjykatës për Kurtin, Haxhiun e Bujupin


Ilustrim

Policia e Kosovës ka bërë të ditur se ka pranuar urdhërarrest për tre deputetët e Kuvendit të Kosovës nga Lëvizja Vetëvendosje, Albin Kurtin, Donika Kadaj - Bujupin dhe Albulena Haxhiu.

Gjykata Themelore në Prishtinë ka lëshuar të mërkurën një urdhërarrest për tre deputetë të Kuvendit të Kosovës nga Lëvizja Vetëvendosje, pasi të njëjtit nuk janë paraqitur në seancë.

“Policia e Kosovës ka pranuar urdhërarrestet dhe konform autorizime që kemi do të ndërmarrim masa”, thonë zyrtarë të Zyrës për komunikim të Policisë së Kosovës në rajonin e Prishtinës.

Tre deputetët akuzohen, për siç thuhet, përdorim të armës ose mjetit të rrezikshëm, përkatësisht hedhjes së gazit lotsjellës në Kuvendin e Kosovës dhe pengim të personit zyrtar në kryerje të detyrës zyrtare.

Ndërkohë, deputetët Albin Kurti, Donika Kadaj- Bujupi dhe Albulena Haxhiu i kanë dorëzuar kryetares së Gjykatës Themelore në Prishtinë, Afërdita Bytyqi, një kërkesë për përjashtimin e trupit gjykues i cili kryesohet nga gjykatësi Beqir Kalludra, anëtarja Shadije Gëguri dhe Shasivar Hoti, anëtar në çështjen penale PKR.nr. 717/15 pranë Departamentit për Krime të Rënda.

Deputetët në arsyetimin e tyre për përjashtimin e këtij trupi gjykues kanë thënë se e vënë në dyshim paanshmërinë e tyre dhe se ky trup gjykues, sipas tyre, nuk është i besueshëm për një gjykim të drejtë.

Gjykata Themelore në Prishtinë ka lëshuar të mërkurën një urdhërarrest për tre deputetë të Kuvendit të Kosovës nga Lëvizja Vetëvendosje, pasi të njëjtit nuk janë paraqitur në seancë.

Ndërsa nuk janë paraqitur në gjykatë, tre deputetë e Lëvizjes Vetëvendosje kanë qenë të pranishëm në seancën e Kuvendit të Kosovës.

Mosparaqitja në seancë gjyqësore e deputetëve të Lëvizjes Vetëvendosje, siç kanë thënë këta të fundit, ka të bëjë pikërisht me dënimin e aktivistëve të Vetëvendosjes, javën e kaluar, me 21 vjet burgim.

Glauk Konjufca deputet i Lëvizjes Vetëvendosje në fjalën e tij në seancën e sotme të Kuvendit ka thënë se gjyqtari në çështjen penale kundër aktivistëve të Lëvizjes Vetëvendosje dhe i njëjti që ka lëshuar urdhërarrest për deputetë ‘po fut Kosovën të një fazë të re mes drejtësisë dhe pushtetit’.

“Si u bë që pesë ditëve pasi shpërndau 21 vite burgim për aktivistët e Vetëvendosjes, në ditën e djeshme dha urdhër për bastisjen e shtëpive të deputetëve Albin Kurti, Albulena Haxhiu, Donika Kadaj, Faton Topalli dhe dha urdhër për arrestimin e tyre. Ky njeri nuk po e fsheh fytyrën, po thotë unë jam pushteti, unë jam këtu. Me gjyqtarë të tillë ky pushtet është në gjendje të bëjë gjithçka”, thotë Konjufca.

Seanca e sotme e Kuvendit të Kosovës është shtyrë për javën tjetër pasi pas që Grupi Parlamentar i Partisë Demokratike të Kosovë në shenjë proteste me veprimet e misionit të Bashkimit Evropian për Sundim të Ligjit – EULEX, la lëshuar seancën plenare.

  • 16x9 Image

    Luljeta Krasniqi - Veseli

    Luljeta Krasniqi, e lindur më 02.05.1981. Me gazetari ka filluar të merret që nga viti 2005. Për një kohë të gjatë ka punuar si gazetare në Agjencinë e lajmeve Kosovalive. Ekipit të Radios Evropa e Lirë i është bashkuar në vitin 2008.

XS
SM
MD
LG