Autoritetet në Mal të Zi janë duke u përballur me rritje të shpejtë të rasteve të infektimit me koronavirus, pas raportimit të rasteve të para të variantit Omicron të këtij virusi.
Më 3 janar, autoritetet kanë raportuar për 12,507 raste aktive me koronavirus.
Shtatë ditë më parë, shifra e rasteve aktive ka qenë 3,310.
Vetëm në 24 orët e fundit, autoritetet kanë regjistruar 1,703 raste të reja.
Instituti i Shëndetit Publik në Mal të Zi ka thënë se varianti Omicron i koronavirusit – i cili është identifikuar 18 ditë më parë në këtë shtet - është dominant dhe po përhapet më shpejt sesa variantet tjera.
Sipas statistikave, numri i personave të infektuar deri më 3 janar, në krahasim me dy javë më parë, është rritur për gati 450 për qind.
Numri i viktimave është ulur për 11 për qind.
“Shumica e pacientëve të rinj janë të grup-moshës 20 deri në 40 vjeç”, është thënë në një deklaratë të Institutit.
Në gjithë shtetin janë hospitalizuar 169 pacientë derisa 29 prej tyre – të infektuar me koronavirus – janë në rrezik për jetë.
Sipas autoriteteve, 44 për qind e popullsisë së Malit të Zi është vaksinuar me dy doza të vaksinës kundër koronavirusit.
Mali i Zi ka një popullsi prej 620,000 banorësh.
Prej shpërthimit të pandemisë, në këtë shtet janë regjistruar rreth 175,000 raste të infektimit me koronavirus.
Prej tyre, 2,420 persona kanë vdekur.
