Seanca konstituive e Kuvendit të Serbisë nis në orën 10:00
Seanca konstituive e Kuvendit të ri të Serbisë pritet të nisë në orën 10:00.
Për herë të parë, në ulëset e tij do të jenë deputetët e Listës Studentore, e cila fitoi zgjedhjet e parakohshme parlamentare të 25 tetorit.
Lista Studentore siguroi 140 mandate, ndërsa lista “Serbia e Bashkuar”, e udhëhequr nga Partia Përparimtare Serbe (SNS), fitoi 103. Pas 14 vjetësh në pushtet, SNS-ja kalon në opozitë.
Në Kuvend do të përfaqësohen edhe partitë e pakicave. Koalicioni Shqiptar dhe Aleanca e Hungarezëve të Vojvodinës kanë nga dy mandate, ndërsa nga një mandat kanë lista “Njerëzisht” e Rasim Lajiqit, “Lëvizja për Bashkim” e Usame Zukorliqit dhe “SDA – Ruajtësit e Sanxhakut”.
Në rendin e ditës janë gjashtë pika: verifikimi i mandateve të deputetëve, zgjedhja e kryetarit dhe e nënkryetarëve të Kuvendit, emërimi i sekretarit të përgjithshëm, si dhe zgjedhja e anëtarëve të trupave punues të Kuvendit dhe e delegacioneve të përhershme parlamentare në institucionet ndërkombëtare. Emrat e kandidatëve për kryetar dhe nënkryetarë ende nuk janë bërë publikë.
Studentët kanë ftuar qytetarët të mblidhen në Parkun e Pionierëve, për t’i përcjellë së bashku përfaqësuesit e Listës Studentore drejt Kuvendit.
Sipas studentëve, sekretari i përgjithshëm i Kuvendit ua ka refuzuar kërkesën për ta ndjekur seancën nga galeria e sallës. Ata kanë thënë se, megjithatë, do të qëndrojnë para ndërtesës së Kuvendit.
Radio Evropa e Lirë do t’ju sjellë përditësime të drejtpërdrejta nga seanca në këtë blog.
Mirëmëngjes!
Sot do ta ndjekim drejtpërdrejt seancën konstituive të Kuvendit të Serbisë.
Kolegët tanë në Beograd do të raportojnë nga vendi i ngjarjes, ndërsa ne do t’ju sjellim këtu zhvillimet kryesore përgjatë ditës.