Shqipëria mbyll kufirin me Kosovën
Autoritetet në Shqipëri kanë vendosur që në kuadër të masave parandaluese kundër përhapjes së koronavirusit të ri, të mbyllin përkohësisht edhe kufirin me Kosovën.
Qendra Kombëtare për Menaxhimin e Kufirit (QKMK) që funksionon në kuadër të Ministrisë së Puinëve të Brendshme në Kosovë ka njoftuar se duke filluar nga data 13 mars, 2020, në ora 06.00, do të ndalohet hyrja në territorin e Republikës së Shqipërisë për të gjithë shtetasit, përkatësisht veturat e Republikës së Kosovës.
”Do të lejohet hyrja vetëm e veturave të shëndetësisë apo ndihmës së shpejtë, automjeteve komerciale (ato të cilat bartin mallra) dhe veturave qeveritare. Kjo masë do të zgjasë deri me datën 15 mars, 2020 në ora 24.00”, thuhet në njoftimin e QKMK-së.
Në kuadër të masave shtrënguese që ndalojnë qarkullimin në Shqipëri, Qeveria e atjeshme ka marrë masa edhe për ndalimin e qarkullimit të mjeteve publike dhe atyre private në Tiranë, Durrës, Shkodër, Lezhë, Elbasan, Fier dhe Vlorë.
Ministri i Brendshëm i Australisë ka koronavirus
Ministri i Punëve të Brendshme i Australisë, Peter Dutton, tha se është infektuar me koronavirus.
Përmes një postimi në Twitter, Dutton tha se është zgjuar të premten me "temperaturë dhe dhimbje të fytit” dhe se “menjëherë ka kontaktuar departamentin e shëndetësisë".
Ai është pranuar në spital.
Nuk ka konfirmim zyrtar ende, por raportohet se Dutton ka ndjekur një takim të kabinetit të martën.
India regjistron vdekjen e parë nga koronavirusi
India regjistroi vdekjen e parë nga koronavirusi, konfirmuan zyrtarët.
Bëhet fjalë për një burrë 76-vjeçar, nga shteti jugor i Karnatakas, i cili ishte kthyer nga Arabia Saudite më 29 shkurt, pas një vizite prej një muaji.
Ministri i Shëndetësisë i shtetit tha se njerëzit që kanë qenë në kontakt me të, janë dërguar në karantinë.
India ka 73 raste të konfirmuara me koronavirus, ka bërë të ditur Ministria e Shëndetësisë e këtij vendi.
Të gjitha shkollat, kolegjet dhe kinematë në Delhi janë mbyllur deri më 31 mars, në përpjekje për të ndihmuar kontrollimin e përhapjes së koronavirusit.
Koronavirusi mbyll Malin Everest
Mali më i lartë në botë Everest është mbyllur për pjesën tjetër të sezonit të ekspeditës, për shkak të shpërthimit të koronavirusit.
Qeveria e Nepalit njoftoi se do t’i anulojë të gjitha lejet e ngjitjes nga 14 marsi deri më 30 prill.
“Kemi vendosur t’i ndalojmë të gjitha vizat turistike deri më 30 prill", tha Narayan Prasad Bidari, sekretar i Zyrës së Kryeministrit.
Ai gjithashtu i këshilloi të huajt që nuk kanë mundur të shmangin shkuarjen në Nepal nga data 14 mars, të qëndrojnë në karantinë për 14 ditë.
Shumica e alpinistëve në Everest vijnë nga Shtetet e Bashkuara, India, Kina, Britania e Madhe, Japonia dhe Koreja e Jugut dhe janë burim kryesor i të ardhurave për Qeverinë e Nepalit.
Kushdo që dëshiron të ngjitet në Everest duhet t'i paguajë qeverisë 11,000 dollarë.