SHBA-ja përfshin Britaninë në masën e ndalim-udhëtimit
Shtetet e Bashkuara do të përfshijnë Mbretërinë e Bashkuar dhe Republikën e Irlandës në masën e ndalim-udhëtimit nga Evropa drejt tokës amerikane.
Kjo masë e re do të nisë së zbatuari nga dita e hënë, ka thënë nën-presidenti amerikan, Mike Pence.
Vendimi paraprak i presidentit amerikan, Donald Trump për ndalim të udhëtimit për 26 vende të botës, është fuqizuar të shtunën.
Pence po ashtu ka njoftuar se secilit amerikan do t’i ofrohet mundësia e testimit falas për koronavirus.
Në të njëjtën konferencë për media, presidenti Trump ka thënë se ka kryer testet për këtë virus dhe pret rezultatet në 48 orët e ardhshme.
Deri më tani në SHBA është raportuar për 51 persona të vdekur dhe 2,488 të infektuar me këtë virus.
Ndërkohë Organizata Botërore e Shëndetësisë ka thënë se Evropa është epiqendra e koronavirusit të ri, që fillimisht ka shpërthyer në Kinë.
Lojërat Olimpike Tokio 2020 "do të mbahen"
Kryeministri japonez, Shinzo Abe ka thënë se Lojërat Olimpike Tokio 2020, do të mbahen sipas planifikimeve paraprake në muajin korrik, pavarësisht pse përhapja e koronavirusit ka rezultuar me shtyrjen apo anulimin e shumë ngjarjeve sportive.
Abe ka thënë se Komiteti Ndërkombëtar Olimpik do të marrë vendimin përfundimtar për këtë cështje.
“Ne do ta tejkalojmë shpërndarjen e infeksionit dhe do të jemi nikoqirë të Lojërave pa ndonjë problem, ashtu si është planifikuar”, ka thënë Abe.
Deri më tani në Japoni është raportuar për 28 persona të vdekur dhe më shumë se 1,400 të prekur nga kjo sëmundje.
Lojërat Olimpike të Tokios pritet të kushtojnë rreth 10.26 miliardë funta britanike, patën thënë organizatorët në muajin dhjetor.
BIK-u pezullon faljen në xhamia
Myftiu i Kosovës, Naim Tërnava ka njoftuar se është pezulluar përkohësisht falja e organizuar në xhamitë e Kosovës.
Përmes një video-mesazhi të publikuar në llogarinë e Bashkësisë Islame të Kosovës në Facebook, myftiu Tërnava, tha se porosit besimtarët që të ndjekin të gjitha rekomandimet e institucioneve gjegjëse, lidhur me parandalimin e përhapjes së koronavirusit të ri.
“Duke u mbështetur në rrethanat e krijuara në Kosovë, me përhapjen e rasteve të të infektuarve me koronavirus, kryesia e BIK-ut pezullon përkohësisht faljen e organizuar me xhemat të namazeve ditore dhe namazeve të xhumasë, ndërsa besimtarët porositën që ditën e premte ta falin namazin e drekës si zëvendësim të namazit të xhumasë në shtëpitë e tyre, ndërsa ezani do të vazhdon të thirret në çdo kohë të namazit ditor”, tha Tërnava.
Ai tha se BIK-u do të pezullojë edhe procesin mësimor në të gjitha institucionet fetare, derisa njoftoi se xhamiat në mbarë Kosovën do të dezinfektohen.
Në Kosovë deri më tani janë konfirmuar tri raste me koronavirusin e ri.
Në Itali, miliona njerëz janë në karantinë dhe 1,266 kanë vdekur nga koronavirusi.
Në Korenë e Jugut, e cila është goditur në të njëjtën kohë, vetëm disa mijëra njerëz janë në karantinë, ndërsa kanë vdekur 72.
Me përhapjen e koronavirusit, këto dy raste ilustrojnë problemet me të cilat vendet e tjera do të përballen gjithnjë e më shumë.
Lexoni artikullin e plotë në këtë link: Pse Koreja e Jugut është më e suksesshme se Italia në shtypjen e koronavirusit?
