Brenda ditës, mbi 170 raste të reja me koronavirus në Holandë
Ministria e Shëndetësisë e Holandës tha se ka regjistruar 176 raste të reja me koronavirus gjatë 24 orëve të fundit dhe tetë vdekje të lidhura me sëmundjen që e shkakton koronavirusi, COVID-19.
Ministria tha se numri total i të infektuarve në gjithë Holandën aktualisht qëndron në 1,135.
Vendet e prekura më së keqi nga koronavirusi në Evropë janë Italia dhe Spanja.
Pothuajse të gjitha shtetet kanë ndërmarrë masa të ashpra për të penguar përhapjen, përfshirë: gjendje të jashtëzakonshme, mbyllje kufijsh e të tjera.
Sllovenia ndalon transportin publik
Transporti publik në gjithë Slloveninë do të ndalojë së funksionuari nga mesnata, në përpjekje për të parandaluar përhapjen e koronavirusit.
Përmes një deklarate për media, Qeveria sllovene po ashtu tha se taksitë do të lejohen të marrin pasagjerë, vetëm nëse "kanë bërë dezinfektimin e duhur të pjesëve të automjetit, që janë në kontakt fizik me pasagjerin".
Sllovenia ka aktualisht 96 raste të konfirmuara me koronavirus.
Në Shkup nxitojnë për rezerva ushqimore
Në Maqedoni të Veriut, deri më 14 mars, janë konfirmuar 18 raste me koronavirusin e ri.
Qeveria ka urdhëruar mbylljen e të gjitha lokaleve dhe qendrave tregtare si dhe ka mbyllur shkollat. T
ë vetmet dyqane që janë të hapura, janë ato ushqimore dhe farmacitë.
Radio Evropa e Lirë ju sjell disa fotografi të bëra më 15 mars në Shkup, ku shihen qytetarët duke blerë rezerva ushqimore, ndërsa disa rrugë janë krejtësisht të boshatisura.
Shkupi në ditët e koronavirusit
Gjermania do të mbyllë disa kufij
Gjermania do të mbyllë pjesën më të madhe të kufijve me Francën, Zvicrën dhe Austrinë nga e hëna, për të penguar përhapjen e koronavirusit, raporton BBC, duke u thirrur në burimet qeveritare.
Gjermania ka regjistruar së paku nëntë vdekje nga koronavirusi dhe 4,585 raste të infeksionit.
Vendet e tjera të Bashkimit Evropian janë duke ndërmarrë po ashtu masa radikale.
Austria, nga e hëna, do të ndalojë çdo tubim të më shumë se pesë vetëve.
Rumania pritet të shpallë gjendje të jashtëzakonshme.
Çekia, e cila tashmë i ka mbyllur kufijtë, pritet të futet në karantinë të përgjithshme.
Këto masa i pasojnë hapat e ngjashëm që kanë ndërmarrë Franca dhe Spanja të shtunën.
Spanja ka raportuar edhe për 97 viktima dhe 2,000 raste të reja në 24 orët e fundit.
Në total, ajo ka 288 njerëz të vdekur dhe 7,753 të infektuar nga koronavirusi.