Gjatë 24 orëve të fundit në Maqedoninë e Veriut nuk është regjistruar asnjë rast i ri
Autoritetet e Maqedonisë së Veriut kanë njoftuar se gjatë 24 orëve të fundit nuk është regjistruar asnjë rast me infeksion të virusit Sars-Cov-2. Megjithatë ato u bëjnë thirrje qytetarëve që të respektojnë rekomandimet, dhe të mos dalin jashtë shtëpisë pa nevojë, ndërkohë që vazhdojnë të mbeten të mbyllura institucionet arsimore, kafiteritë dhe qendrat tregtare.
Deri më tani në Maqedoninë e Veriut janë konfirmuar 18 raste me koronavirusin e ri.
Shkupi në ditët e koronavirusit
IKSHPK: Aktualisht ka teste të mjaftueshme për COVID-19
Instituti Kombëtar i Shëndetit Publik të Kosovës nga data 08.02.2020 deri me 14.03.2020, ka testuar gjithsej 207 mostra të dyshimta për koronavirusin e ri SARS-CoV-2.
Prej tyre janë konfirmuar trembëdhjetë raste të prekur nga Covid-19, sëmundja që shkaktohet nga koronavirusi.
Megjithëkëtë zyrtarë në këtë institucion, i thanë Radios Evropa e Lirë, se sa i përket reagencave (materialet e testimit) për të kryer teste të virusit, tash për tash ka mjaftueshëm, dhe nuk ka vend për shqetësim.
Ndryshe në klinikën Infektive në Qendrën Klinike Universitare të Kosovës, janë gjithsej 125 shtretër. Prej tyre vetëm gjashtë kanë respiratorë. Kështu thotë për Radion Evropa e Lirë infektologu, Valbon Krasniqi.
Respiratorët përdoren për filtrimin e ajrit nga ndotësit te pacientët që janë të prekur nga sëmundjet e rënda.
Bavaria shpallet zonë katastrofe
Për herë të parë në historinë e tij moderne, i gjithë rajoni gjerman i Bavarisë është shpallur zonë katastrofe, për shkak të krizës me koronavirus.
Bavaria është landi i dytë më i pasur i Gjermanisë dhe ka një popullsi prej 13 milionë banorësh.
Të gjitha shkollat dhe çerdhet janë mbyllur.
Në Bavari ka pasur rritje të ndjeshme të të infektuarve me koronavirus.
Deri në mesditën e së dielës kanë qenë 886 raste - nga të cilat 205 janë regjistruar brenda 24 orësh.
Pesë pacientë të moshuar kanë vdekur.
Qytetarët në Bavari, megjithatë, vazhdojnë të lëvizin lirshëm nëpër rrugë, ndryshe nga disa pjesë të tjera të Evropës.
Por, masat e tjera përfshijnë:
- Nga e marta, baret, kinematë dhe pishinat do të mbyllen, së bashku me bizneset jothelbësore;
- Orare më të zgjatura të punës për supermarketet, farmacitë, stacionet e benzinës dhe bankat;
- Restorantet dhe kafenetë do të punojnë me orar të kufizuar nga ora 06:00 deri në 15:00, ndërsa klientët do të duhet të qëndrojnë në distancë.
Vetizolohet Marine Le Pen
Politikania e ekstremit të djathtë në Francë, Marine Le Pen, tha se është vetizoluar, pasi ka takuar njerëz që kanë treguar simptoma të koronavirusit, raporton BBC.
Të enjten e kaluar, ajo po ashtu thuhet të jetë ulur pranë një personi që ka dalë pozitiv në testet e koronavirusit.
Le Pen aktualisht nuk ka simptome.
