Dy raste me koronavirus në Mal të Zi
Mali i Zi konfimon dy rastet e para me koronavirusin e ri. Lajmin e ka konfirmuar kryeministri, Dushko Markoviq.
Mali i Zi ka qenë vendi i vetëm në rajonin e Ballkanit Perëndimor që deri më tani nuk ka pasur të konfirmuara raste me koronavirusin e ri.
Numri i të vdekurve në Itali po rritet, por niveli i infeksioneve është ngadalësuar
Italia ka raportuar për 345 vdekje të reja gjatë 24 orëve të fundit nga koronavirusi i ri.
Kjo është një rritje prej 16 për qind në krahasim me një ditë më herët.
Deri më tani janë shënuar 2,503 të vdekur nga infeksioni.
Megjithatë autoritetet raportuan se niveli i infeksioneve të reja është duke rënë.
Numri i të infektuarve është 31,506 nga 27.980 sa ishin një ditë më herët.
Sipas autoriteteve ky është niveli më ulët i rasteve të reja brenda një dite, që nga shpërthimi i pandemisë në këtë vend.
Edhe dy raste me koronavirus në Kosovë
Instituti Kombëtar i Shëndetit Publik ka njoftuar edhe për dy raste të reja me koronavirus në Kosovë.
Numri i përgjithshëm i të infektuarve shkon në 19.
"Sot me 17.03.2020 janë konfirmuar edhe dy raste pozitive për virusin SARS-CoV-2: Rastet janë nga komuna e Gjakovës, të kthyer nga Dusseldorfi i Gjermanisë, njëri i gjinisë mashkull 54 vjeç dhe tjetri i gjinisë femër 49 vjeç", thuhet në njoftimin e Institutit.
Në ndërtesën e Qeverisë së Kosovës janë vendosur ngjyrat e flamurit të Italisë në shenjë solidarizimi ndaj viktimave si pasojë e virusit Sars-Cov-2.
