Thaçi: Në rast nevoje, të shpallet menjëherë gjendja e jashtëzakonshme
Presidenti i Kosovës, Hashim Thaçi, tha të dielën se institucionet e shtetit duhet të jenë të gatshme, që në rast nevoje, të shpallet menjëherë gjendja e jashtëzakonshme, për shkak të situatës së krijuar me koronavirus.
Thaçi, përmes një postimi në Facebook, i shprehu ngushëllime një familjeje nga Dumnica e Podujevës, një anëtar i së cilës ka humbur jetën nga koronavirusi, duke u bërë viktima e parë nga kjo sëmundje në Kosovë.
“Ne duhet t’i ndihmojmë mjekët, duke qëndruar të mbyllur në shtëpitë tona dhe duke i zvogëluar mundësitë e përhapjes më të madhe të këtij virusi. Institucionet e shtetit duhet të jenë të gatshme, që në rast nevoje të shpallet menjëherë gjendja e jashtëzakonshme. Duke punuar së bashku do ta tejkalojmë edhe këtë sfidë”, tha Thaçi.
Më 17 mars, Thaçi për herë të parë ka propozuar shpalljen e gjendjes së jashtëzakonshme, por ajo është kundërshtuar nga kryeministri i Kosovës, Albin Kurti.
Qeveria e Kosovës, ditë më parë, ka shpallur gjendje emergjente për shëndetin publik.
Rastet e para me koronavirus në Kosovë janë konfirmuar më 13 mars.
Deri më tash janë 31 persona të prekur, ndërsa një pacient ka humbur jetën.
Ministri Vitia kërkon masa shtesë kundër koronavirusit
Ministri i Shëndetësisë i Kosovës, Arben Vitia, kërkoi nga kryeministri i Kosovës, Albin Kurti, që t'i propozojë Qeverisë masa shtesë kundër koronavirusit, me qëllim të mbrojtjes së shëndetit publik.
“Këto masa do të diskutohen sot edhe me ministritë e linjave dhe do paraqiten në mbledhjen e Qeverisë. Të gjitha këto masa do të shpjegohen saktë për qytetarët pasi të kenë marrë miratimin”, tha Vitia në një postim në Facebook.
Kosova, javën e kaluar, ka shpallur gjendje emergjente për shëndetin publik, për shkak të situatës së krijuar me koronavirus.
Në kuadër të masave të ndërmarra janë mbyllur shkollat, kafiteritë, parqet, janë pezulluar disa linja tokësore dhe ajrore e të tjera.
Në Kosovë aktualisht janë 31 raste të konfirmuara me koronavirus, ndërsa të dielën është regjistruar viktima e parë.
Në Kosovë konfirmohet viktima e parë nga koronavirusi
Në Kosovë u konfirmua të dielën viktima e parë nga koronavirusi.
Instituti Kombëtar i Shëndetit Publik (IKSHPK) njoftoi se viktima është një burrë 82 vjeç nga Dumnica e Podujevës.
“Pacienti i lindur më 1938, fshati Dumnicë, Komuna e Podujevës, është pranuar në Klinikën Infektive më 16.03.2020, në ditën e 6 të sëmundjes me shenja të infiltrimit pulmonar dhe pneumonisë masive majtas”.
“Pacienti ka pasur edhe sëmundje shoqëruese kronike: kardiake dhe sëmundje kronike mushkërore”, thuhet në njoftimin e IKSHPK-së.
“Së paku edhe një vit” deri te vaksina
Mike Ryan, drejtor ekzekutiv i Programit për Emergjenca Shëndetësore pranë Organizatës Botërore të Shëndetësisë, tha se do të duhet “së paku edhe një vit” për të krijuar vaksinën kundër koronavirusit.
Duke folur për BBC-në, ai tha se, megjithatë, është bërë “përparim i mirë” në zhvillimin e trajtimeve me barna.
Ryan shtoi se është e rëndësishme që mjekët të lejohen të sjellin prova që trajtimet funksionojnë dhe janë të sigurta.
Organizata Botërore e Shëndetësisë e ka cilësuar Evropën si epiqendër të koronavirusit, i cili besohet se e ka origjinën në Kinë.
Numrin më të madh të vitimave në botë e ka Italia, me mbi 4,800 të vdekur nga koronavirusi.