Franca regjistron 365 vdekje shtesë nga koronavirusi
Franca ka raportuar të enjten për 365 persona të vdekur si pasojë e koronavirusit, duke përfshirë një 16-vjeçare.
Kjo njëherësh ka qenë shifra më e lartë e viktimave që është shënuar brenda 24 orëve.
Shefi për shëndetësi në Francë, Jerome Salomon u ka thënë gazetarëve se një total prej 1,696 personave kanë vdekur nëpër spitale në Francë nga virusi, duke thënë se në këtë shifër nuk përfshihen ata që kanë vdekur nëpër shtëpi apo qendra për të pensionuarit.
Ai ka thënë se deri më tani, 29,155 persona kanë dalë pozitivë në testet me këtë virus në Francë, duke shtuar se numri real i rasteve me siguri është shumë më i lartë.
Deri më tani, në gjithë botën është raportuar për më shumë se gjysmë milioni persona të infektuar me sëmundjen Covid-19, të cilën e shkakton koronavirusi.
Mbi gjysmë milioni njerëz të prekur nga koronavirusi
Numri i personave të infektuar nga koronavirusi në botë ka tejkaluar shifrën 500,000.
Sipas të dhënave të Universitetit, Johns Hopkins, aktualisht në botë janë 510,000 persona të infektuar me këtë sëmundje.
Deri më tani, më shumë se 22,000 persona kanë vdekur nga sëmundja Covid-19 që shkakton ky virus, përderisa, Italia, shteti i prekur më së keqi nga koronavirusi ka raportuar për 8,165 persona të vdekur.
Deri më tani në Kosovë autoritetet kanë raportuar për 79 persona të infektuar me koronavirus, si dhe për një pacient të vdekur.
Shkon në 79 numri i të prekurve me koronavirus në Kosovë
Instituti Kombëtar i Shëndetësisë Publike ka raportuar për tetë raste të reja të prekura me koronavirus në Ksoovë.
“Sot në Laboratorin e Mikrobiologjisë Molekulare në IKSHPK me metodën RT-PCR, janë testuar 89 persona nga të cilet 8 kanë rezultuar pozitivë. Megjithatë më në fund e kemi lajmin e mirë. Njëri nga pacientët edhe pas testimit të dytë ka dalur NEGATIV. Sipas rekomandimeve të OBSh kur kemi dy mostra negative të një personi me një ditē distancë kohore, tregojnë shërimin nga COVID-19”, ka thënë Ministri në detyrë i Shëndetësisë, Arben Vitia përmes një postimi në rrjetin social, Facebook.
Ai po ashtu ka bërë të ditur edhe për të shëruarin e parë nga kjo sëmundje.
Duke shtuar edhe të prekurit e fundit deri më tani në Kosovë është raportuar për 79 raste me Covid-19 ndërsa një pacient ka vdekur tashmë nga virusi që shkakton këtë sëmundje.
Rreth 700 objekte të dezinfektuara në Prishtinë
Komuna e Prishtinës ka njoftuar se deri më tani ka dezinfektuar rreth 700 objekte, duke përfshirë institucione e banesa kolektive, me qëllim të parandalimit të përhapjes së koronavirusit të ri.
Miranda Mullafazliu, zëdhënëse në Kuvendin Komunal të Prishtinës ka dhënë këtë deklaratë për Radion Evropa e Lirë:
‘’Fillimisht janë dezinfektuar të gjitha hapësirat e punës, objektet dhe veturat e administratës të Komunës së Prishtinës. Është bërë dezinfektimi i të gjitha institucioneve edukativo-arsimore, pra çerdhet dhe shkollat, institucionet shëndetësore dhe veturat e autoambulancat, institucionet kulturore, qendrat për të moshuar, hyrjet e banesave kolektive, duke përfshirë edhe banesat kolektive për rastet sociale në Hajvali dhe Fushën e Pajtimit, rreth 700 në total’’.
Aktualisht në Kosovë është raportuar për 71 persona të prekur me koronavirusin e ri, ndërkohë që një person ka vdekur nga kjo sëmundje.