SHBA-ja pezullon udhëtimet nga Brazili
Shtetet e Bashkuara kanë vendosur kufizime të udhëtimit për shtetasit e huaj, që kanë qenë në Brazil në 14 ditët e fundit.
Brazili ka numrin e dytë më të lartë në botë të infektuarve me koronavirusin e ri, gjithsej 363,211.
Deri më tani janë shënuar 22 mijë viktima nga sëmundja COVID-19, që e shkakton koronavirusi.
Një zëdhënëse e Shtëpisë së Bardhë tha se kufizimet në udhëtim do të ndihmonin që personat e infektuar të mos hyjnë në SHBA.
"Vendimi do të ndihmojë që shtetasit e huaj që kanë qenë në Brazil të mos bëhen burim i infeksioneve shtesë në vendin tonë", tha sekretarja i shtypit e Shtëpisë së Bardhë, Kayleigh McEnany.
Kufizimi nuk do të ndikojë në tregtinë midis dy vendeve.
Ndalimi i udhëtimit nuk do të zbatohet për shtetasit e SHBA-së.
"Potenciali për transmetimin e virusit nga persona të infektuar që kërkojnë të hyjnë në Shtetet e Bashkuara nga Brazili kërcënon sigurinë e sistemit tonë të transportit dhe infrastrukturës si dhe sigurinë kombëtare", thuhet në vendim.
SHBA-ja aktualisht është vendi më i goditur në botë nga pandemia me mbi 1.6 milion raste të infektuarve dhe mbi 97 mijë viktima.
Dhjetë viktima të reja nga COVID-19 në Gjermani
Gjermania ka njoftuar se gjatë 24 orëve të fundit, 10 persona kanë vdekur nga sëmundja COVID-19, që shkaktohet nga koronavirusi i ri.
Numri i përgjithshëm i vdekjeve ka arritur në 8,257, tha Instituti gjerman Robert Koch.
Sipas të dhënave më të fundit të Institutit, numri i përgjithshëm i personave të infektuar me koronavirus në Gjermani është 178.570.
Të hënën ky vend ka lehtësuar masat e izolimit duke lejuar hapjen e restoraneve.
Gjermania ka miratuar një paketë fillestare shpëtimi me vlerë më shumë se 750 miliardë euro, për të lehtësuar ndikimin e pandemisë në ekonomi.
Vendi është zhytur në recesion pasi pësoi tkurrjen e saj më të madhe tremujore, që nga kriza financiare e vitit 2009.
Ekonomia u tkurr me 2.2% në tre muajt e parë të vitit 2020, pasi dyqanet dhe bizneset u mbyllën, në mes të marsit, për të luftuar përhapjen e koronavirusit.
Policia e Kosovës ndalon 53 persona që s’i respektuan masat kundër koronavirusit
Policia e Kosovës ka njoftuar se gjatë 24 orëve të fundit, në 13 raste ka arrestuar 53 persona në komunat e ndryshme të Kosovës, për mosveprim në përputhje me dispozitat shëndetësore gjatë pandemisë.
Sipas njoftimit të Policisë së Kosovës, në dy raste në komunën e Ferizajit janë ndaluar 33 persona, në tre raste në Prizren - 12 persona, në pesë raste në Gjilan - 5 persona, si dhe në tre raste në Mitrovicën e Jugut janë ndaluar 3 persona.
Shumica e rasteve të ndalimit të këtyre personave ka të bëjë me mosrespektimin e orarit të lëvizjes gjatë pandemisë dhe punën në lokale afariste, për të cilat ekzistojnë ende ndalesat, por edhe tentimi për mbajtje të ritualit fetar në formë të organizuar.
Me rekomandimin e Institutit Kombëtar të Shëndetësisë Publike të Kosovës, Ministria e Shëndetësisë aktualisht po zbaton masën e kufizimit të lëvizjes së qytetarëve në Kosovë, dy herë nga 2 orë në ditë, sipas numrave të parafundit personal në letërnjoftimeve.
Sipas të dhënave të Institutit Kombëtar të Shëndetit Publik, në Kosovë deri më tani janë regjistruar 1,032 raste me COVID-19. Prej tyre, 789 janë shëruar dhe 29 persona kanë vdekur.