Ndërlidhjet

Krerët politikë në Shqipëri u bëjnë thirrje qytetarëve që të votojnë  


Zgjedhjet e përgjithshme në Shqipëri.
Zgjedhjet e përgjithshme në Shqipëri.

Në Shqipëri, të dielën qytetarët po votojnë në zgjedhjet e përgjithshme parlamentare. Krerët shtetërorë dhe politikë u kanë bërë thirrje qytetarëve që të ushtrojnë të drejtën e tyre të votimit.

Presidenti i Shqipërisë, Ilir Meta tha se vendi “mbrohet me votë dhe sjellje të qytetëruar evropiane”.

“Barazinë para ligjit e garanton barazia e votës. Çdo qytetar të votojë i lirë dhe me dinjitet për alternativën dhe kandidatin që beson. I ftoj të gjithë që tek alternative të zgjedhin kandidatët më me integritet. Sot votimi është një akt patriotik.”, u shpreh Meta.

Kryetari i Kuvendit të Shqipërisë Gramoz Ruçi ka votuar dhe u ka bërë thirrje krerëve të partive politike që “t’i nënshtrohen verdiktit të sovranit”.

“Sot do të fitojë qytetaria e qytetarëve. Ne politikanët duhet të heshtim, të ndjekim procesin dhe t’i nënshtrohemi verdiktit të sovranit. Sot fitojnë vetëm qytetarët. Kushdo që do të mundohet për të bërë pis do të dështojë. Nga nesër do të ketë një fitues. Nga nesër fituesi duhet të dijë të të administrojë fitoren”, tha Ruçi.

Kryeministri i Shqipërisë, Edi Rama, pasi votoi tha se të gjithë qytetarët të dalin në votime, duke shtuar se pa marrë parasysh dallimet politike, vendi duhet te ketë unitet.

“Sot është dita që të mos ushqejmë asnjë ndjenjë negative ndaj atyre që me votën e vet shprehin një opinion tjetër. Mos të harrojmë sot e asnjëherë që jemi një familje e madhe në të njëjtin atdhe. Askush mos të harrojë se demokracia është një sport pa spektatorë dhe secili duhet të dalë vetë në fushë dhe të gjuajë me votë. Kështu që zbrisni në fushë gjuajeni penalltinë tuaj dhe në fund fitoftë më i miri”, u shpreh Rama.

Edhe kryetari i PD-së Lulzim Basha, iu bëri thirrje qytetarëve që të dalin masivisht në votime.

“Sot është një ditë e mrekullueshme, një ditë historike për vendin. Është dita kur të gjithë ne kemi në fuqi në dorën tonë, shqiptarët kanë në dorë fuqinë për fëmijët, për familjet, për vendin, për kombin. Sot është dita të dilni dhe të votoni masivisht, të bëni të mundur të ardhmen që dëshironi. Sot është dita e Shqipërisë, dilni masivisht në votime”, u shpreh kandidati për kryeministër në zgjedhjet e 25 prillit.

Edhe kryetarja e Lëvizjes Socialiste për Integrim, Monika Kryemadhi, pas hedhjes së votës, bëri thirrje që qytetarët të votojnë.

“Dua t’ju bëj thirrje sot të gjithë qytetarëve që t’ju drejtohen qendrave të votimit të qetë, të bindur, për atë që duan të realizojnë nëpërmjet votës së tyre. Vota e qytetarëve është një votë e shenjtë, është një votë që për hir të së vërtetës do ti japë mundësinë dhe shansin të rinjve dhe të rejave, të gjithë qytetarëve, që nëpërmjet verdiktit të tyre të çojmë Shqipërinë më shumë se kurrë drejt Evropës”, tha Kryemadhi.

Në zgjedhjet e 25 prillit, të drejtë vote kanë 3.6 milionë qytetarë. Zgjedhjet e fundit parlamentare që janë mbajtur në Shqipëri, ishin ato të vitit 2017, ku është regjistruar edhe pjesëmarrja më e ulët historike në zgjedhjet për Kuvendin që nga viti 1991, me 46.76% e qytetarëve që kanë marrë pjesë në këtë proces.

XS
SM
MD
LG