LVV fiton bindshëm - i hapet rruga për formimin e qeverisë së re

Koalicioni i organizatave joqeveritare, Demokracia në Veprim tha se sipas të dhënave nga vëzhguesit në terren, dalja deri në orën 17:00 është 38.9 për qind.

“Sa për krahasim, dalja në votime në intervalin e njejtë kohor në zgjedhjet e 9 shkurtit, ishte e njejtë rreth 39%”, tha Eugen Cakolli nga DnV.

Procesi, sipas DnV-së, është i qetë dhe vështirësitë më të mëdha kanë të bëjnë me gjetjen e vendvotimeve nga votuesit.

“Nga hapja e vendvotimeve deri në orën 17:00, këto vështirësi janë raportuar në 70% të vendvotimeve, madje në 15% të vendvotimeve kjo dukuri ka qenë e shprehur deri në 30 raste”.

Sa i përket votimit me asistencë, Cakolli tha se komisionarët në 75 për qind të vendvotimeve kanë kërkuar dokumente mjekësore nga votuesit në mënyrë që të lejohen të votojnë me ndihmën e dikujt tjetër.

Sa i përket fotografimit të votës, deri në orën 17:00, sipas DnV-së janë raportuar 21 raste.

Ndërkaq, si incidente më serioze nga DnV-ja janë cilësuar problemet me furnizim me energji elektrike dhe probleme me fletëvotime.

“Dy orë para përmbylljes së procesit të votimit, po raportohet për ndërprerje të energjisë elektrike në të paktën dy qendra të votimit. Po ashtu në një vendvotim është raportuar se kodet në fletëvotime nuk po përputhen”, thanë nga DnV-ja.

Në orën 19:00 ka nisur mbyllja e qendrave të votimit në 38 komunat e Kosovës.

Si rëndom, në qendrat ku ka ende votues ato mbesin të hapura edhe pas orës 19:00, për t’iu mundësuar qytetarëve që të votojnë.

Sipas të dhënave të KQZ-së, deri në orën 17:00 votuan mbi 38 për qind e afër 2 milionë qytetarëve me të drejtë vote.

Dalja më e madhe është regjistruar në komunat në veri, të banuara me shumicë serbe, ndërkaq në kryeqendër, Prishtinë, dalja deri në orën 17:00 ishte 45.59 për qind.

KQZ pritet të publikojë së shpejti në platformën e saj shifrat për daljen e përgjithshme në votime.

Pas përfundimit të procesit zgjedhor, tri televizione në Kosovë kanë publikuar rezultatet e exit poll-eve, duke e nxjerr të parën Lëvizjen Vetëvendosje të Albin Kurtit.

Sipas sondazhit të televizionit Dukagjini, LVV-ja pritet të fitojë 45.7 për qind, PDK-ja 22, LDK-ja 15.6 për qind dhe AAK-ja 5.3.

Sondazhi i Klan Kosovës parashikon që LVV-ja të fitojë 44.1 për qind, PDK-ja 23.9, LDK-ja 16.1 për qind dhe AAK-ja 5.8 për qind.

Ndërkaq, exit poll-i i T7-shit nxjerr LVV-në me 43.5 për qind, PDK-në me 23.6 për qind, LDK-në me 15.9 për qind dhe AAK-në me 7.2 për qind.

Asnjëra nga këto sondazhe nuk ka parashikuar që Nisma Socialdemokrate të kalojë pragun zgjedhor.

Dalja në zgjedhjet e së dielës është 44.56 për qind, sipas 98.32 për qind të vendvotimeve të procesuara.

Bazuar në këto të dhëna të publikuara në platformën e KQZ-së, del se dalja është më e lartë se në zgjedhjet e 9 shkurtit, kur brenda vendit deri në orën 19:00 kishin votuar 40 për qind e trupit votues.