Ndërlidhjet

logo-print

Qytetarët ankohen për çmimet e larta


Treg në Prizren...

Treg në Prizren...

Qytetarët e Kosovës vazhdojnë të përballen me ngritje të çmimeve të konsumit.

Sipas raportit të fundit të Agjencisë së Statistikave të Kosovës, indeksi i tërësishëm i çmimeve të konsumit në Kosovë është më i lartë për 0,1 për qind në muajin shkurt 2013, krahasuar me muajin janar 2013. Derisa shkalla e inflacionit e matur në muajin shkurt 2013, me muajin shkurt 2012, ishte 2,6 për qind.

Qytetarë të Kosovës të anketuar nga Radio Evropa e Lirë japin mendimet e tyre rreth ngritjes së çmimeve në tregun kosovar.

Shaban Berisha, qytetar, thotë se rritja e çmimeve të produkteve ushqimore ka ulur standardin jetësor në familjen e tij. Sipas tij, fuqia blerëse ka rënë në masë të dukshme.

“Çdo herë kemi ngritje të çmimeve, nuk ka lirime. Një shembull, nëse para pak muajve ke arritur të blesh me 50 euro 20 produkte ushqimore, sot nuk arrin t’i blesh 10 produkte ushqimore me 50 euro. Shporta e konsumatorit çdo ditë është më e varfër”, thotë ky qytetar.

Ngritja e çmimeve në Kosovë ka goditur më së shumti njerëzit, të cilët edhe ashtu e shpenzonin pjesën më të madhe të të ardhurave për ushqim.

Qytetarët ankohen se e kanë të vështirë mbijetesën nëse vazhdon një trend i tillë i çmimeve.

Suzana Gashi, mësimdhënëse, tregon se gati çdo muaj vëren artikuj që kanë ndryshuar në çmim duke pësuar ngritje.

“Shumë herë më ndodh që një produkt, të cilin e kam marrë para një muaji me një çmim më të ulët, në muajin tjetër e marr me çmim më të lartë. Nuk arrijë ta kuptoj çfarë po ndodh - është normale kjo apo ngrihen çmimet vetë nga tregtarët pa pasur nevojë”, thotë ajo.

Ngjashëm mendon edhe Naim Berisha:

“Punoj qe tre vjet në një kompani. Për këto tre vjet, nuk kam pasur ngritje të pagës, derisa çmimet gjatë këtyre tre vjetëve vazhdimisht janë ngritur. Nuk e di a duhet të ndërhyjë dikush që të mos ketë ngritje të këtyre çmimeve, apo është një gjë normale që po ndodh dhe ne duhet të përshtatemi?!”.

Profesori i ekonomisë, Isa Tahiri, thotë se krahas rritjes së çmimeve të produkteve ushqimore, duhet të gjenden mënyra edhe për rritjen e pagave të punëtorëve në sektorin publik dhe krijimin e një ambienti më të përshtatshëm në sektorin privat.
Çdo ngritje e çmimeve të produkteve ushqimore ul fuqinë blerëse.

“Derisa inflacioni në Evropë muajve të fundit ka qenë 2.2 për qind, në Kosovë kjo mund të jetë 10 për qind, e më shumë. Çdo ngritje e çmimeve të produkteve ushqimore ul fuqinë blerëse”, thotë Tahiri.

Ndryshe, sipas Bankës Qendrore të Kosovës, gjatë vitit të kaluar, norma mesatare e inflacionit ishte 7.3 për qind.

Ngritje e çmimeve vërehet te perimet, buka dhe drithërat, mishi, vajrat dhe yndyrat furnizimi me ujë dhe shërbimet e ndryshme që kanë të bëjnë me vendbanimin.

Kurse, rënie e çmimeve vërehet te sheqeri dhe ëmbëlsirat, por edhe çmimit të druve për ngrohje.
  • 16x9 Image

    Luljeta Krasniqi - Veseli

    Luljeta Krasniqi, e lindur më 02.05.1981. Me gazetari ka filluar të merret që nga viti 2005. Për një kohë të gjatë ka punuar si gazetare në Agjencinë e lajmeve Kosovalive. Ekipit të Radios Evropa e Lirë i është bashkuar në vitin 2008.

XS
SM
MD
LG