Presidenti i Shteteve të Bashkuara të Amerikës, George Bush u takua me liderët e NATO-s dhe të Bashkimit Evropian. Ai ofroi mbështetjen amerikane për Aleancën dhe transformimet brenda saj. "I çmoj transformimet që po bëhen në NATO. Nëse mbetet e ngërthyer në të kaluarën, ajo dalëngadalë do të bie në harresë" tha Bush. Ndërkohë, në një konferencë për shtyp me kryeministrin e Luksemburgut, Jean Claude Juncker dhe presidentin e Komisionit Evropian, Manuel Barroso, presidenti Bush foli edhe për raportet me Iranin dhe Rusinë. "Idea se Shtetet e Bashkuara të Amerikës po përgaditen për të sulmuar Iranin, është, thjeshtë, qesharake. Duke thënë këtë, të gjitha opcionet janë në tryezë" tha Bush. Ndërsa, për çështjen e lirisë së shtypit në Rusi presidenti amerikan tha se i pëlqejnë vendet ku ka liri të shtypit. "Ka pasur disa lëvizje kur qeveria e Rusisë, më duket, për të shfrytëzuar më mirë fjalën, nuk ka licencuar disa anëtarë të shtypit" tha Bush. Gjatë takimeve të tij në Bruksel rreth 1.000 persona protestuan para selisë së Bashkimit Evropian.
Përdorimi i përmbajtjes sonë
⚠️ Përmbajtja e ueb-faqes dhe/apo platformave të tjera digjitale të Radios Evropa e Lirë mbrohet nga ligjet amerikane dhe ndërkombëtare për të drejtën e autorit.
Mirëpresim ripërdorimin, ripublikimin dhe rishpërndarjen e përmbajtjes sonë, të publikuar në platformat tona digjitale, me kusht që të na citoni drejt si "Radio Evropa e Lirë", bashkë me linkun që çon te përmbajtja jonë origjinale.
