Sekretari amerikan i Mbrojtjes Donald Rumsfeld ka shkuar sot papritmas në Bagdad, me ç'rast e ka vizituar edhe burgun Abu-Ghraib. Rumsfeld ka thënë veprimet që janë ndërmarrë në dëm të të burgosurve serioze dhe ka premtuar nxjerrjen e përgjegjësve para drejtësisë. "Si të gjithë ju dhe shumica e amerikanëve, edhe unë isha i tronditur. Por, përgjegësit do të përgjigjen para drejtësisë", tha Rumsfeld. Ndërkohë, Lynndie England, ushtarja amerikane e akuzuar për keqtrajtimin e të burgosurve irakienë tha se kishte marrë urdhëra për të keqtrajtuar të burgosurit dhe për t'u fotografuar me ta.
