Presidenti i Shteteve të Bashkuara Barak Obama e ka porositur sot Iranin se duhet t’i dëshmojë qëllimet e veta paqësore.
Pas informatës se Irani po ndërton një uzinë sekrete nëntokësore për pasurimin e uraniumit, i cili mund të shfrytëzohet për armë bërthamore, Obama e paralajmëroi Teheranin se do të përballet me pasojat nëse nuk lejon inspektimin e kësaj uzine bërthamore.
Në fjalimin e përjavshëm radiofonik, Obama tha se Irani duhet të bashkëpunojë në tërësi me Agjencinë Ndërkombëtare për Energji Bërthamore.
“Udhëheqësit e Iranit tani duhet të zgjedhin”, tha Obama, duke shtuar se nëqoftëse ata nuk i përmbushin obligimet, rrezikojnë “t’i ekspozohen presionit dhe izolimit më të madh”.
