Shtetet e Bashkuara dhe Bashkimi Evropian shpresojnë që bisedimet e ngecura mes Iranit dhe bashkësisë ndërkombëtare të rifillojnë sa më shpejt.
Shefja e politikës së jashtme evropiane, Kethrin Eshton tha se bisedimet e mundshme duhet të fokusohen vetëm tek programi bërthamor i Teheranit.
Departamenti i Shtetit deklaroi se është i përgatitur për rifillimin e bisedimeve mes gjashtë fuqive botërore dhe Iranit.
“Ashtu siç dëshironim vitin e kaluar, dhe e përsërisim sërish, jemi të interesuar për procesin, ku do të përfshiheshim të gjithë me shpresën se do të kishim dhe përgjigje për shumë nga pyetjet e bashkësisë ndërkombëtare”, tha Filip Krollei, zëdhënësi i Departamentit të Shtetit.
Shtetet e Bashkuara dhe vendet aleate dyshojnë se Irani synon prodhimin e armëve bërthamore, akuza që hidhen poshtë nga Teherani.