Zyrtarët pakistanezë të sigurisë thanë se nga sulmet raketore të Shteteve të Bashkuara janë vrarë tetë militantë, pesë nga të cilët shtetas gjermanë, me origjinë turke dhe arabe. Sulmi amerikan i së hënës ndodhi në rajonin kufitar mes Pakistanit e Afganistanit në Vaziristanin e veriut, një zonë fisnore. Kjo zonë njihet si një nga qendrat e talibanëve dhe Al Kaidës.
Shtetet e Bashkuara dhe një numër vendesh të tjera kanë tërhequr vërejtjen për rrezikun në rritje të sulmeve terroriste në Evropë. Shërbimet amerikane të zbulimit i kanë lidhur planet për sulme me militantët në Pakistan.
Gjatë shtatorit ka pasur 20 sulme raketore amerikane në zonën kufitare mes Pakistanit e Afganistanit nga të cilat janë vrarë 120 militantë.