Italia ka thënë se “është në luftë” me trafikantët e migrantëve dhe i ka bërë thirrje Bashkimit Evropian që të ndërmarrë veprime të fuqishme për të ndaluar vdekjet e migrantëve në Mesdhe.
Kryeministri Matteo Renzi i ka bërë këto komente në prag të samitit të së enjtes të BE-së për krizën me migrantë.
Ministrja e Mbrojtjes e Italisë, Roberta Pinotti, i ka thënë televizionit italian se BE-ja duhet të konsiderojë ndërhyrjen ushtarake.
Mbi 800 njerëz kanë vdekur pasi anija e tyre, e cila është nisur nga Libia, është mbytur të dielën në ujërat e Mesdheut.
Numri i njerëzve që bëjnë përpjekje të largohen nga lufta dhe varfëria në Lindjen e Mesme dhe Afrikë, është rritur mujave të fundit.
Rreth 1,750 njerëz kanë vdekur këtë vit në ujërat e Detit Mesdhe, përfshirë edhe viktimat nga incidenti i fundit.
