Papa Françesku do ta realizojë një udhëtim në ishullin grek të Lesbosit më 16 prill, ka njoftuar Vatikani.
Papa do ta përdorë këtë udhëtim një ditor për të dhënë përkrahjen e tij për refugjatët dhe për të tërhequr vëmendjen lidhur me krizën e migrantëve në Evropë.
Me qindra mijëra refugjatë nga vendet që vijnë nga zonat e luftës, si Siria, Afganistani dhe Iraku kanë zbarkuar gjatë vitit të kaluar në ishullin grek.
Por, sipas një marrëveshjeje ndërmjet Turqisë dhe Bashkimit Evropian, autoritetet greke kanë nisur deportimin e refugjatëve në Turqinë fqinje.
Papa në vazhdimësi ka folur për përkrahjen e tij ndaj refugjatëve dhe ka kërkuar nga Kishat Katolike kudo në Evropë që t’i pranojnë familjet e migrantëve.
Vetëm ishulli Lesbos ka pranuar me qindra mijëra migrantë.
Zëdhënësi i Vatikanit, At Federico Lombardi tha se Papa dëshiron të “dëshmojë sensin e solidaritetit dhe të përgjegjësisë”.