Zëvendësministri i integrimeve evropiane, Ramadan Ilazi, i tha Radios Evropa e Lirë se liberalizimi i vizave për Kosovën ka shumë gjasa të përmbyllet deri në fund të vitit, pasi të jenë përmbushur kërkesat e Komisionit Evropian për lëvizje të lirë.
Ilazi tha se zhvillimet brenda BE-së brenda javëve të ardhshme mund të ndikojnë në ngadalësimin e marrjes së vendimit për liberalizim të vizave për shtetasit e Kosovës.
“Kjo është bindja jonë e thellë që Kosova do të marrë liberalizmin e vizave deri në fund të vitit, kuptohet, përveç nëse do të ketë ndonjë surprizë të paparashikuar, ku debati rreth zonës Schengen që është duke u zhvilluar në BE të merr një kahe tjetër. Mos te harrojmë që gjatë qershorit kemi zhvillime të tjera të rëndësishme, siç është referendumi për Britaninë e Madhe, për fatin e këtij shteti në raport me Bashkimin Evropian, do të mbetet apo do të largohet nga Bashkimi Evropian".
"Të gjitha këto zhvillime mund të kenë ndonjë efekt negativ në proces, por e jona është që të sigurohemi qëasnjë obligim që ne e kemi në këtë proces të mos e injorojmë dhe anashkalojmë dhe të sigurohemi që e kemi plotësuar” tha Ilazi për Radion Evropa e Lirë, duke theksuar se po zhvillohet edhe fushatë vetëdijesuese për qytetarët e Kosovës rreth obligimeve nga liberalizimi i vizave
Komisioni Evropian në fillim të muajt maj, në një raport të tij, ka propozuar liberalizimin e vizave për Kosovën me kushtin e ratifikimit të marrëveshjes për demarkacionin e kufirit me Malin e Zi, të kundërthënshëm për opozitën, dhe rezultate konkrete në luftën kundër korrupsionit dhe krimit të organizuar. Komisioni tha se do mbrojë propozimin e tij para Këshillit Evropian dhe Parlamentit Evropian, dy institucione që duhet të vendosin për cështjen e liberalizimit të vizave paraprakisht.
Raportuesja e Parlamentit Evropian për liberalizim të vizave, Tanja Fajon, i tha Radion Evropa e Lirë, se Parlamenti në Kosovë duhet “ta miratojë sa më shpejt marrëveshjen për demarkacion” me qëllim të hapjes së mundësisë për lëvizje të lirë të qytetarëve.
“Raporti është në Parlament por sic e thash ratifikimi I marrëveshjes së kufirit, pas gjithë bisedave që kam pasur në ditët e kaluara, është një kusht absolut dhe pres që Parlamenti i Kosovës ta ratifikojë sa më shpejt të jetë e mundur”, tha Fajon.
Opozita në Kosovë ndërkohë, pas një vale kundërshtimesh në fund të vitit të kaluar, ka ritheksuar faktin se çdo përpjekje për ta futur në Parlament çështjen e kufirit do të përballet me reagime. Së fundi ajo ka kërkuar një komision të ri që do ta përkufizojë mirë, sipas saj, kufirin me Malin e Zi.
Përmbushja e kushteve të paraqitura nga Komisioni Evropian, pavarësisht reagimeve të opozitës, do të mund të ndikojë në qëndrimin e fortë të një pjese të vendeve anëtare të BE-së që e kanë kundërshtuar liberalizimin e vizave.
Theks i veçantë thuhet të jetë vënë në sundimin e ligjit, ose më thjeshtë një aksion më vendimtar i autoriteteve të vendit në luftën kundër korrupsionit.
Sidoqoftë, vera e sivjetme mund të kalojë në çështje procedurale brenda Këshillit Evropian dhe Parlamentit të Evropës, dhe ka pak gjasa që ato të përmbyllen brenda disa muajsh.
Vendimi për lëvizje të lirë mund të merret më vonë gjatë vitit, por edhe zyrtarët e Kosovës e kanë të qartë se lëvizja e lirë mund të bëhet jo para dhjetorit të këtij viti.
Facebook Forum