Policia e Kosovës e ka konfirmuar se tre persona janë vrarë me armë zjarri në një lokal në pjesën e vjetër të Gjakovës.
Sipas njoftimit të Drejtorisë Rajonale të Policisë në Gjakovë rasti ka ndodhur pasditen e sotme në lokalin “Deep Bar” në çarshinë e vjetër të Gjakovës.
Një person ka vdekur në vendin e ngjarjes, ndërsa dy të tjerë janë deklaruar të vdekur nga mjekët në emergjencën e spitalit rajonal “Isa Grezda” të Gjakovës.
Sipas njoftimit të Policisë, viktimat janë: V. I me kombësi shqiptare dhe i moshës 35 vjeçare, A. I., gjithashtu shqiptar ndërsa i moshës 28 vjeçare. Viktima e tretë është Z. K., 37 vjeçar me kombësi shqiptare.
“Në vendin e ngjarjes kanë dal të gjitha njësitet relevante të policisë së Kosovës dhe kryeprokurori i Prokurorisë Themelore në Gjakovë”, thuhet në njoftimin e Policisë në Gjakovë.
Policia gjithashtu ka njoftuar se “patrullat policore janë vënë në kërkim të personave të dyshuar të mundshëm”.