Ndërlidhjet

Veseli bisedon me Hoyt Yee: Demarkacioni duhej të procedohej para mocionit


Nga takimi i fundit Veseli - Hoyt Yee
Nga takimi i fundit Veseli - Hoyt Yee

Kryetari i Kuvendit të Kosovës, Kadri Veseli ka njoftuar se ka zhvilluar një bisedë telefonike me zëvendës ndihmës sekretarin amerikan të shtetit, Hoyt Brian Yee, me të cilin kanë diskutuar për zhvillimet e fundit politike në Republikën e Kosovës.

Gjatë bashkëbisedimit, kryetari Veseli thuhet se ka vlerësuar se ekziston një ngecje në vendimmarrje, ndërsa ka rikonfirmuar kërkesën se duhet të ecet përpara në marrjen e vendimeve të rëndësishme për të ardhmen integruese të vendit.

Kryetari Veseli, sipas kësaj komunikate, ka diskutuar me diplomatin amerikan Hoyt Yee edhe për kërkesën e qartë të Shteteve të Bashkuara të Amerikës që Qeveria dhe Kuvendi të procedojnë me demarkacionin nesër (e mërkure) para mocionit të mosbesimit të qeverisë.

“Në rast të mos procedimit të demarkacionit para mocionit ndaj qeverisë, duhet të lëvizet përpara në rrugëzgjidhje tjera”, thuhet në komunikatë.

Veseli, përfundon komunikata, e ka siguruar zyrtarin e lartë amerikan se Partia Demokratike e Kosovës është në tërësi në mbështetje të qëndrimeve amerikane dhe do të ndërmarrë të gjitha hapat e nevojshëm për ecjen përpara.

XS
SM
MD
LG