Ndërlidhjet

Britanikët thonë se e kanë vazhduar këmbimin e informacioneve me SHBA-të


Pjesëtarë të policisë britanike në qytetin Mançester

Policia e Britanisë thotë se dje e ka vazhduar këmbimin e informacioneve me agjencitë e Shteteve të Bashkuara, pasi ka marrë siguri për ruajtjen e tyre, duke e përfunduar një pezullim të shkurtër për shkak të rrjedhjes së informacioneve në mediat amerikane lidhur me sulmin vetëvrasës në Mançester.

“Derisa ne zakonisht nuk bëjmë komente për aranzhimet e këmbimit të informatave, megjithatë pasi kemi marrë sigurime të reja, ne tash po punojmë për së afërti me partnerët tanë kryesorë në gjithë botën, përfshirë ata në aleancën e inteligjencës Pesë Sytë”, tha Mark Rowley, oficeri udhëheqës britanik kundër terrorit.

Kjo aleancë përbëhet nga Britania, Shtetet e Bashkuara, Kanadaja, Australia dhe Zelanda e Re.

Mbrëmë, kryeministrja britanike, Theresa May, bisedoi me presidentin amerikan, Donald Trump, me ç’rast u theksua se këmbimi i informacioneve të inteligjencës ndërmjet dy vendeve të tyre duhet të mbetet i sigurt.

Nga ana tjetër, policia britanike sot e ka arrestuar edhe një person në një lagje të qytetit Mançester, kështu qënë arrest lidhur me sulmin vetëvrasës me bombë, ishin gjithsej 10 vetë të dyshuar.

Por, pasi u liruan pa akuzë një mashkull e një femër, tetë meshkuj mbesin në arrest, ka njoftuar policia e qytetit Mançester në rrjetin Twitter.

XS
SM
MD
LG