Një gjykatë ushtarake në Egjipt ka dënuar me vdekje 36 persona, nën dyshimin se kanë qenë të përfshirë në tri bombardime vdekjeprurëse nëpër kishat e krishtera koptike, përgjegjësinë për të cilat e kishte marrë grupi militant Shteti Islamik.
Në prill të vitit 2017, 46 persona u vranë në dy sulme vetëvrasëse me bomba në dy kisha, një në qytetin Tanta dhe një në Aleksandria.
Ndërkaq, gjatë një sulmi vetëvrasës në një katedrale në Kajro, në dhjetor të vitit 2016 ishin vrarë 28 njerëz.
Të dënuarit janë në mesin e 48 personave që janë akuzuar për bashkim në grup terrorist, pengim të punës së institucioneve shtetërore dhe dëmtim të unitetit kombëtar dhe sigurisë.
Dënimet me vdekje të shqiptuara nga gjykata ushtarake në Egjipt, duhet t’i dërgohen edhe autoritetit më të lartë ligjor islamik, Myftiut të Madh, i cili do të japë një mendim që nuk është i detyrueshëm.
