Ndërlidhjet

Macron kërkon nga shtetet lindore të mos i lënë vlerat evropiane mënjanë


Presidenti i Francës, Emmanuel Macron.

Presidenti i Francës, Emmanuel Macron, takon të premten udhëheqësit e Sllovakisë dhe të Republikës Çeke.

Përpara se të nisej drejt Bratisllavës, Macron i paralajmëroi shtetet lindore të Bashkimit Evropian që të mos bien ndesh me parimet e bllokut.

Në një intervistë të publikuar në mediat çeke, hungareze, polake dhe sllovake, Macron tha se "Evropa nuk është një supermarket" dhe se shtetet lindore nuk mund të zgjedhin midis vlerave themelore të BE-së.

"Evropa nuk është rrugë me një drejtim: është angazhim reciprok", tha Macron.

Ai shprehu shqetësim për, siç tha, refuzimin e disa shteteve lindore të BE-së që të pranojnë migrantë nga Lindja e Mesme dhe Afrika e Veriut në bazë të një sistemi me kuota, i cili është hartuar në kohën e krizës me refugjatë në vitin 2015.

"Ne kemi nevojë kolektive për koherencë dhe solidaritet: ne nuk mund të përfitojmë nga buxheti evropian pa treguar solidaritet mbi migrimin", tha Macron.

Ai do të takojë në Bratisllavë presidentin sllovak, Andrej Kiska, dhe kryeministrin Peter Pellegrini, ndërsa në Pragë presidentin çek, Milos Zeman, dhe kryeministrin Andrej Babis.

XS
SM
MD
LG