Dy policë u vranë dhe një roje e sigurisë u plagos në një sulm në konsullatën e Kinës në qytetin Karaçi të Pakistanit.
Të shtënat me armë u dëgjuan rreth orës 9:30 të mëngjesit, sipas kohës lokale, jashtë konsullatës në zonën Klifton, tha policia.
Katër persona të armatosur bënë përpjekje për të hyrë në konsullatë, por u ndaluan nga rojet e sigurisë.
Tre sulmues u vranë në një shkëmbim zjarri me policinë.
Sipas disa njoftimeve, stafi i konsullatës është i sigurt.
"Kina e dënon fuqishëm çdo sulm të dhunshëm kundër agjencive diplomatike dhe kërkon nga Pakistani të marrë masa praktike për të garantuar sigurinë e qytetarëve dhe të institucioneve kineze në vend", tha zëdhënësi i Ministrisë së Jashtme të Kinës, Geng Shuang.
Një grup separatist, i quajtur Ushtria Çlirimtare e Baluçistanit, tha se ka kryer sulmin.
Me vite, projektet e ndërtimit dhe punëtorët kinezë në provincën Baluçistan janë shënjestruar nga militantët.