Kryetari i Lidhjes Demokratike të Kosovës, Isa Mustafa, tha se vendosja e taksës 100 për qind ndaj mallrave serbe dhe boshnjake nga ana e Qeverisë së Kosovës është një vendim populist.
“Qeveria duhet të japë më shumë informacione se si i ka bërë llogaritë për pasojat që sjell ky vendim te bizneset dhe në rritjen e çmimeve”, tha Mustafa pas mbledhjes së Këshillit të Përgjithshëm të LDK-së.
Megjithatë, sipas Mustafës, vendimet qeveritare duhet të jenë të matura mirë si dhe të koordinuara në bazë të marrëveshjeve që ka me vendet e rajonit dhe BE-në.
Serbia, tha Mustafës e meriton një masë të tillë për shkak të veprimeve të saj kundër Kosovës, megjithatë Qeveria e Kosovës është dashur që të bëjë një analizë për kundërmasat.
“Rritja e taksës nuk është bërë në bazë të një analize, por në bazë të emocioneve karshi asaj që ata na kanë penguar në INTERPOL, ndërsa ne po ia kthejmë në këtë mënyrë”, theksoi Mustafa.
Lidhja Demokratike e Kosovës pas mbledhjes së Këshillit të Përgjithshëm bëri thirrje për mbajtjen e zgjedhjeve të Përgjithshme në një afat sa më të shpejt, pasi vlerëson se institucionet e vendit nuk janë efektive në ushtrimin e detyrave të tyre.
