Klinika Infektive e Qendrës Klinike Universitare të Kosovës, ka njoftuar se aktualisht janë të hospitalizuar 11 pacientë, ndërsa 9 prej tyre me COVID-19, sëmundja që shkaktohet nga koronavirusi i ri.
Një pacient është në gjendje të rëndë shëndetësore.
“Nga 9 pacientët e infektuar me COVID 19, 5 janë në gjendje stabile, kurse 1 pacient është me gjendje të rënduar dhe po trajtohet në repart me oksigjenoterapi dhe përkujdesje intensive”, thuhet në njoftim e Klinikës Infektive.
Klinika Infektive është në pritje të rezultateve të koronavirusit për 2 pacientë.
Në Kosovë janë konfirmuar 1.004 raste të infektuarve me koronavirusin e ri, prej të cilëve 29 kanë vdekur dhe 772 janë shëruar.
Rastet e para me koronavirusin e ri u shfaqën më 13 mars.
Deri më tani janë testuar 12.551 persona.
Për të frenuar përhapjen e mëtejmë të virusit, autoritetet kanë shpallur gjendje emergjente të shëndetit publik.
- Për më shumë lajme rreth koronavirusit përcilleni blogun e Radios Evropa e Lirë.