Ndërlidhjet

Tahiri: Flakron Shala kishte përgatitjet e duhura për konsull


Ilustrim.

Çështja e emërimit si konsull të Flakron Shalës, djalit të deputetit të Aleancës për Ardhmërinë e Kosovës, Haxhi Shala, është kthyer të enjten në çështje diskutimi në Kuvendin e Kosovës.

Kjo çështje u ngrit në seancën e Kuvendit të Kosovës nga deputetja e Lëvizjes Vetëvendosje, Fitore Pacolli. Ajo u është drejtuar me një pyetje përfaqësuesve të Qeverisë së Kosovës, nëse emërimi i Shalës ka qenë “pazar politik” për votimin e qeverisë nga ana e deputetit Haxhi Shala.

Në emër të qeverisë për këtë çështje u përgjigj zëvendëskryeministri Besnik Tahiri.

Ai tha se rasti apo personi në fjalë [Flakron Shala] ka përgatitje të duhur akademike.

"Ai i ka përcjellë të gjitha procedurat dhe fatmirësisht apo fatkeqësisht ka qëlluar [rastisur] të jetë djali i Haxhi Shalës”, ka thënë Tahiri, duke shtuar se "nuk është gjë e duhur që me një diskurs të tillë të sulmohen fëmijët e politikanëve".

Kurse, ministrja e Punëve të Jashtme dhe Disasporës, Meliza Haradinaj - Stublla, deklaroi se nuk ka as nuk do të ketë nënshkrim të sajin në vendime, të cilat janë të jashtëligjshme.

"Secili emërim i konsujve të përgjithshëm, edhe këtë vit, si të gjitha vitet paraprake prej kur ekziston Ministria e Punëve të Jashtme, është propozuar në përputhje me dispozitat kushtetuese dhe ligjet, si dhe praktiken e deritanishme 12-vjeçare", tha ajo.

Më 25 nëntor, ushtruesja e detyrës së presidentit të Kosovës, Vjosa Osmani, ka shfuqizuar katër dekrete për konsuj të përgjithshëm, konkretisht për konsujt në Pragë, Lubjanë, Shkup dhe Tiranë.

Dekretet ishin nënshkruar nga ish-presidenti Hashim Thaçi.

Osmani e ka marrë këtë vendim pasi mediat lokale kanë raportuar për emërimin e Flakron Shalës si konsull i Përgjithshëm në Pragë.

Rikujtojmë se vota e Haxhi Shalës ka qenë vendimtare në votimin e qeverisë aktuale të drejtuar nga Avdullah Hoti.

Gjatë seancës së Kuvendit të Kosovës, kur është votuar për qeverinë e re, deputeti Shala pati deklaruar se ai ka ndryshuar mendimin për ta votuar qeverinë, pasi një natë më parë kishte takuar ish-presidentin e Kosovës, Hashim Thaçin, dhe kryetarin e Aleancës për Ardhmërinë e Kosovës, Ramush Haradinaj.

Emërimi i Flakron Shalës në këtë pozitë ishte kundërshtuar edhe nga shoqëria civile në Kosovë.

Kryeministri i Kosovës, Avdullah Hoti, pati thënë se emërimi i Shalës, ishte bërë pa pasur një koordinim me të.

Ndërsa, vetë Flakron Shala përmes një postimi në rrjetet sociale ka thënë se në pozitën konsullit të Përgjithshëm është “emëruar sipas ligjit në fuqi”.

“Prindi im, Haxhi Shala, si një deputet i Kuvendit të Republikës së Kosovës nuk ka as më shumë e as më pak autoritet ligjor e politik se deputetët tjerë- pra deputeti nuk ka kompetencë të emërojë apo shkarkojë zyrtarët e MPJ-së dhe as konsujt e Përgjithshëm”, ka shkruar Shala.

Të shkarkuarit tjerë janë: Blendi Kilaj – Lubjanë, Lindon Kqira – Shkup dhe Halim Krasniqi – Tiranë, ka raportuar kallxo.com.

Blendi Kilaj, është djali i Isni Kilajt, ish-zëvendësministër i Financave në Kosovë dhe zyrtar i Partisë Demokratike të Kosovës.

Mes tjerash, Osmani është zotuar se do të vazhdojë të insistojë, që të mos tejkalohet kuota e emërimeve politike, e paraparë me Ligjin për Ministrinë e Punëve të Jashtme dhe Shërbimin Diplomatik, dhe që emërimet të bëhen nga radhët e diplomatëve të karrierës.

XS
SM
MD
LG