Në mesnatë ka filluar heshtja zgjedhore për votimet presidenciale në Serbi, që mbahen të dielën. AFP raporton se këto votime shihen si mundësi për këtë vend që ta zgjedhë rrugën e tij të ardhshme drejt integrimeve të mëtejme me Bashkimin Evropian ose me forcimin e lidhjeve me aleatin tradicional, Rusinë. Favoritë në këto zgjedhje janë presidenti aktual pro perëndimor, Boris Tadiq dhe ultra nacionalisti pro rus, Tomisllav Nikoliq. Integrimi i Serbisë në BE ishte çështje kryesore në fushatën zgjedhore që u bë në periudhën kur pritet që Kosova do ta shpallë deklaratën e pavarësisë, me mbështetjen e Shteteve të Bashkuara dhe të shumicës së vendeve të Bashkimit Evropian.
