Gjykata e Posaçme e Apelit në Shqipëri tha të premten se do të vendosë më 25 qershor për ankesën e Alfred Belerit, kryetarit të zgjedhur të bashkisë së Himarës, kundër dënimit me dy vjet burgim për vjedhje votash.
Në mars, Gjykata e Posaçme e dënoi Belerin me dy vjet burgim për akuzën e vjedhjes së votave në zgjedhjet lokale të 14 majit 2023.
Ankesa e mbrojtjes së Belerit kundër vendimit të gjykatës së shkallës së parë u shqyrtua të premten nga Gjykata e Apelit në Tiranë, e cila tha se vendimin do ta bëjë të ditur më 25 qershor.
Beleri dhe avokatët e tij mbrojtës i kanë cilësuar akuzat si politike dhe të pabazuara.
"Provat ndaj meje janë minipuluar. Unë ndërgjegjen e kam të qetë dhe ju, kur ta shpallni vendimin, shpresoj ta keni ndërgjegjen e qetë", tha Beleri gjatë seancës.
Prokurori Adnan Xholi kërkoi që Apeli ta mbajë në fuqi dënimin e shkallës së parë kundër Belerit.
Në seancën e së premtes morën pjesë familjarë dhe mbështetës të Belerit, përfshirë edhe ambasadoren greke në Tiranë, Konstantina Kamitsi.
Beleri fitoi ulëse në Parlamentin Evropian si përfaqësues i partisë udhëheqëse në Greqi, Demokracia e Re, në zgjedhjet e qershorit.
Kreu i shoqatës së minoritetit grek në Shqipëri “Omonia”, Marin Suli, ka thënë për Radio Evropa e Lirë se Beleri ka deklaruar se, nëse shpallet i pafajshëm, ai "do ta zgjedhë mandatin e kryebashkiakut të Himarës" para ulëses së eurodeputetit.
Zgjedhja e Alfred Belerit si deputet i Parlamentit Evropian shkaktoi polemika - si për legjitimitetin e tij, ashtu edhe për ndikimin e rastit të tij në integrimin evropian të Shqipërisë.
Juristë dhe ekspertë të marrëdhënieve ndërkombëtare thonë se rasti i tij ngre shqetësime kushtetuese dhe ligjore.
Sipas tyre, ai mund të ndikojë edhe në përpjekjet e Shqipërisë për anëtarësim në Bashkimin Evropian, por edhe në marrëdhëniet e saj me Greqinë.
Alfred Beleri, me shtetësi shqiptare dhe greke, ishte kandidat i opozitës për kryetar të Bashkisë së Himarës - qytet i banuar edhe me popullsi greke në jug të Shqipërisë - në zgjedhjet e majit të vitit 2023.
Ai u arrestua pak ditë para zgjedhjeve nën dyshimet për blerje votash.
Pavarësisht se ishte në paraburgim atëkohë, Beleri i fitoi zgjedhjet, por nuk u betua asnjëherë. Në mars të këtij viti u dënua me dy vjet burgim.
Rasti nxiti kritika të mëdha në Athinë, ku Ministria e Jashtme tha se “dënimi dyvjeçar është padyshim joproporcional me masën e veprës së supozuar”.
Partia e kryeministrit grek, Kyriakos Mitsotakis, e emëroi pastaj kandidat për zgjedhjet për Parlamentin Evropian, të cilat u mbajtën nga data 6 deri më 9 qershor, ku ai u zgjodh.
