Thaçi, Veseli, Krasniqi e Selimi këmbëngulin në pafajësi në deklaratat përmbyllëse

18 shkurt 2026

Mimoza Sadiku dhe
Ekrem Idrizi

• Ish-presidenti i Kosovës, Hashim Thaçi, ish-kryeparlamentarët, Kadri Veseli e Jakup Krasniqi, dhe ish-deputeti, Rexhep Selimi, u deklaruan sërish të pafajshëm në deklaratat e tyre përmbyllëse në Gjykatën Speciale në Hagë më 18 shkurt.

• Ish-eprorët e UÇK-së, akuzohen për krime lufte dhe krime kundër njerëzimit, për të cilat të katërtit janë deklaruar të pafajshëm.

• Prokuroria ka kërkuar që ata të shpallen fajtorë dhe të dënohen me nga 45 vjet burgim secili, por ekipet mbrojtëse kanë argumentuar se nuk ka prova për krimet e pretenduara dhe kanë kërkuar lirimin e tyre.

• Çështja gjyqësore u përmbyll këtu dhe tani gjykatësit kanë tre muaj kohë për ta marrë një vendim për çështjen, ose të kërkojnë zgjatjen e afatit për marrjen e vendimit.

11:17

Mbrojtja e Veselit: Fajësia nuk mund të shpallet mbi thashetheme

Avokati i Kadri Veselit, Rodney Dixon, tha se gjykata nuk mund të shpallë fajtor një person, nëse kjo shpallje fajësie “mbështetet mbi prova të patestuara dhe thashetheme”.

Ai përsëriti se ZPS nuk ka asnjë provë që lidh Veselin me krimet e pretenduara.

Dixon tha se të hënën, ZPS bëri një përpjekje të fundit për ta lidhur Veselin me pikat e aktakuzës.

“Ata pretendojnë se ne nuk e kemi trajtuar themelin e akuzën e ZPS. Kjo është akuzë e rëndë sepse unë trajtova çdo pretendim të tyre për t’iu treguar se ishin të pabaza”, tha Dixon.

11:24

Mbrojtja: Të gjitha argumentet kundër Veselit janë të pabazuara

Avokati Dixon tha se të gjitha pretendimet e drejtpërdrejta apo rrethanore kundër Veselit “janë të pabazuara”.

Si shembull ai mori një video të publikuar nga ZPS në gjykatore ku një dëshmitar tha se kishte dëgjuar nga dikush se Veseli ishte përfshirë në krime.

“Ky është thashethem i pastër. Ky klip është i pavlerë”, tha ai, duke shtuar se nuk është provë dhe se mbrojtja nuk ka mundur ta marrë në pyetje këtë dëshmitar.

Ai po ashtu tha se kundërshtojnë që dëshmia e një dëshmitari për ndalimet në Kleçkë, është dëshmi e bazuar “në thashetheme”.

11:33

Mbrojtja thotë se s’ka prova që Veseli ka kontribuar në NPK

Në fjalën e tij, avokati Dixon tha se nuk ka prova që Veseli ka kontribuar në Ndërmarrjen e Përbashkët Kriminale. Ai tha se Veseli ka qenë për periudha të shumta jashtë vendit.

“Edhe kur ndodhej në Kosovë, Veseli ka marrë pjesë në shumë pak takime dhe ka shkuar shumë rrallë në Shtabin e Përgjithshëm. Nuk ka komanduar ndonjë strukturë të inteligjencës apo askënd dhe nuk ka qenë aktiv në Drejtorinë Politike. Madje as anëtarësia në këtë drejtori nuk është vërtetuar”, tha ai duke shtuar e Veseli nuk ka pasur role kriminale.

11:37

Mbrojtja e Veselit kërkon që ai të shpallet i pafajshëm

Avokati Dixon kërkoi që trupi gjykues ta shpallë të pafajshëm Kadri Veselin, pasi tha se nuk ka prova që e lidhin atë me krimet e pretenduara në atakuzë.

Ai kritikoi ZPS-së se nuk ka ofruar një lidhje mes pretendimeve se Veseli ka kryer krime.

Ky, tha ai, është "dembellëk dhe përbuzje të kësaj gjykate që nuk është krijuar për hir të dënimit"

Shfaq më shumë