Self para verdiktit: Anshmëria politike të mos ketë vend në Hagë
Kongresisti amerikan, Keith Self, shprehu shqetësim për atë që ai e konsideron ndikim të anshmërisë politike në vendimmarrjen e institucioneve të drejtësisë në Hagë, pak para shpalljes së aktgjykimit ndaj Hashim Thaçit, Kadri Veselit, Rexhep Selimit dhe Jakup Krasniqit.
“Një temë e vazhdueshme që duket se po del nga Haga, është lejimi i anshmërisë politike që të ndikojë në vendimet e saj”, shkroi Self në X.
Ai shfaqi shpresën që, sipas tij, një anshmëri e tillë të mos shfaqet gjatë shpalljes së vendimit në rastin ndaj katër ish-krerëve të UÇK-së.
Self, i cili kryeson Nënkomisionin për Evropën në Komitetin për Punë të Jashtme të Dhomës së Përfaqësuesve, e lidhi çështjen edhe me situatën më të gjerë në rajon, duke e përshkruar Ballkanin si një “fuçi baruti”.
Sipas tij, në rajon ka regjime shtypëse që do të preferonin të nxisnin ndarje, në vend se të punonin drejt pajtimit.
Mbi 28 milionë euro për mbrojtjen e katër të akuzuarve
Kosova ka paguar rreth 28.47 milionë euro për mbrojtjen juridike dhe mbështetjen e Hashim Thaçit, Kadri Veselit, Rexhep Selimit dhe Jakup Krasniqit, nga viti 2021 deri më 14 shtator 2026.
Në total, mbi 40.6 milionë euro janë paguar nga buxheti i Kosovës për personat e akuzuar para Dhomave të Specializuara. Prej tyre, rreth 39.8 milionë euro janë shpenzuar për mbrojtjen juridike.
Kosova e ka marrë përsipër me ligj mbështetjen financiare të personave të akuzuar para Speciales. Të dhënat e buxheteve tregojnë se për këtë qëllim janë ndarë mbi 60 milionë euro gjatë periudhës 2018–2026.
Nëse procesi vazhdon në apel, ligji parasheh mbështetje financiare edhe gjatë fazave të mëtejshme të procedurës.
Qytetarë mblidhen pranë Speciales në Hagë
Ndërsa afrohet nisja e seancës, qytetarë janë mbledhur pranë ndërtesës së Dhomave të Specializuara në Hagë.
Disa prej tyre mbajnë flamuj të UÇK-së, si dhe fotografi të Thaçit, Veselit, Selimit dhe Krasniqit.
Më poshtë mund të shihni pamje nga Haga pak para nisjes së seancës.
Edhe një orë deri në nisjen e seancës
Edhe një orë ka mbetur deri në nisjen e seancës në Dhomat e Specializuara në Hagë, ku do të shqiptohet aktgjykimi i shkallës së parë ndaj Hashim Thaçit, Kadri Veselit, Rexhep Selimit dhe Jakup Krasniqit. Seanca pritet të nisë në orën 10:00, ndërsa transmetimi publik në ueb-faqen e Dhomave të Specializuara do të bëhet me 10 minuta vonesë.
Për çfarë akuzohen Thaçi dhe të tjerët?
Hashim Thaçi, Kadri Veseli, Rexhep Selimi dhe Jakup Krasniqi - të gjithë figura të larta të Ushtrisë Çlirimitare të Kosovës gjatë luftës së viteve 1998 dhe 1999 - ndodhen në paraburgim në Hagë që nga nëntori i vitit 2020, kur u bë publike aktakuza kundër tyre.
Ajo përfshin gjashtë pika për krime kundër njerëzimit: përndjekje, burgosje, akte të tjera çnjerëzore, torturë, vrasje dhe zhdukje me forcë, si dhe katër pika për krime lufte: arrestim dhe ndalim të paligjshëm ose arbitrar, trajtim mizor, torturë dhe vrasje.
Në atë dosje, katërshja përshkruhet si pjesë e një “ndërmarrjeje të përbashkët kriminale”, që synonte marrjen dhe ushtrimin e kontrollit përmes frikësimit, keqtrajtimit dhe largimit të kundërshtarëve.
Viktimat e tyre, sipas aktakuzës, përfshinin serbë, romë dhe shqiptarë që nuk mbështesnin UÇK-në.
Së paku 102 persona dyshohet se u vranë, ndërsa më shumë se 20 mbeten të zhdukur.
Prokuroria pretendon gjithashtu se të akuzuarit, për shkak të pozitave të tyre drejtuese, mbajnë përgjegjësi edhe për krimet e kryera nga vartësit e tyre.
Të katër të akuzuait janë deklaruar të pafajshëm për akuzat.