Nis transmetimi publik nga Haga
Ka nisur transmetimi publik nga salla e Dhomave të Specializuara në Hagë.
Hashim Thaçi, Kadri Veseli, Rexhep Selimi dhe Jakup Krasniqi janë në sallë, ku po shqiptohet aktgjykimi i shkallës së parë ndaj tyre.
Transmetimi po zhvillohet me 10 minuta vonesë.
Qytetarë mblidhen edhe në Skenderaj
Qytetarë janë mbledhur edhe në Skenderaj për ta përcjellë shpalljen e aktgjykimit ndaj Hashim Thaçit, Kadri Veselit, Rexhep Selimit dhe Jakup Krasniqit.
Përmes një ekrani të madh, të pranishmit po e ndjekin drejtpërdrejt transmetimin e seancës nga Dhomat e Specializuara në Hagë.
Nis seanca për shpalljen e aktgjykimit
Në këto çaste, në Dhomat e Specializuara në Hagë ka nisur seanca për shpalljen e aktgjykimit ndaj Hashim Thaçit, Kadri Veselit, Rexhep Selimit dhe Jakup Krasniqit.
Për shkak të vonesës prej 10 minutash në transmetimin publik, pamjet nga salla e gjyqit pritet të bëhen të qasshme nga ora 10:10.
Qindra qytetarë në Prishtinë presin verdiktin
Qindra qytetarë janë mbledhur në qendër të Prishtinës për ta përcjellë drejtpërdrejt shpalljen e aktgjykimit ndaj Hashim Thaçit, Kadri Veselit, Rexhep Selimit dhe Jakup Krasniqit.
Në sheshin “Skënderbeu” është vendosur një ekran i madh, ku të pranishmit do ta ndjekin transmetimin e seancës nga Dhomat e Specializuara në Hagë.
Shumë prej tyre mbajnë flamuj dhe simbole të UÇK-së.
