Franca reagon lidhur me vendimin e Speciales
Ministria e Jashtme e Francës tha pas vendimit të Gjykatës Speciale ndaj katërshes së UÇK-së se aktgjykimi mund të apelohet, teksa riktheksoi mbështetjen për gjykatën në Hagë.
“Franca rithekson mbështetjen e saj për Dhomat e Specializuara të Kosovës dhe rikujton përkushtimin e saj për luftën kundër mosndëshkimit. Po ashtu, Franca rikonfirmon mbështetjen e palëkundur për pavarësinë dhe institucionet e Kosovës”, u tha në reagim.
Më poshtë ju sjellim një video përmbledhëse të vendimit në Hagë dhe reagimeve që pasuan:
Gjermania bën thirrje që të respektohet vendimi i Speciales
Ambasadori gjerman në Kosovë, Rainer Rudolph, bëri thirrje të respektohet vendimi i Gjykatës Speciale, teksa shtoi se Kosova ka bashkëpunuar me mekanizmat ndërkombëtarë të drejtësisë.
“Duke themeluar Dhomat e Specializuara dhe duke bashkëpunuar me Tribunalin Ndërkombëtar Penal për ish-Jugosllavi, Kosova ka dëshmuar se ka kryer përgjegjësitë e saj, përfshirë ballafaqimin me krimet e luftës, si shtet i pavarur dhe sovran”, tha ambasadori Rudolph.
Sipas ambasadorit gjerman, vendimi ndaj ish-eprorëve të UÇK-së, “në asnjë mënyrë nuk i shfajëson aktorët jugosllavë nga përgjegjësia për konfliktin e armatosur dhe shkeljet në shkallë të gjerë të të drejtave të njeriut të kryera ndaj popullit të Kosovës në fund të viteve ’90, të cilat tashmë janë hetuar nga gjykatat ndërkombëtare dhe që nxitën ndërhyrjen e komunitetit ndërkombëtar”.
Amnesty: Dënimet ndaj Thaçit dhe të tjerëve tregojnë se zyrtarët e lartë nuk janë mbi ligjin
Organizata për të drejtat e njeriut, Amnesty International, tha se dënimet për krime lufte ndaj ish-presidentit të Kosovës, Hashim Thaçi, dhe tre ish-zyrtarëve të tjerë të lartë të Ushtrisë Çlirimtare të Kosovës, u japin shpresë viktimave që kanë pritur për drejtësi “për më shumë se dy dekada”.
Kështu u citua të ketë thënë Esther Major, zëvendësdrejtoreshë rajonale për Evropën në Amnesty International, sipas një njoftimi në uebfaqen e organizatës.
Ajo tha se vendimet “tregojnë se zyrtarët e lartë nuk janë mbi ligjin” dhe se vendimet japin shpresën se “çdo përpjekje për të penguar drejtësinë, të vërtetën dhe reparacionet nuk do të tolerohet”.