Elshani: Situatë e qetë në veri, Policia e gatshme të reagojë në rast incidentesh
Situata në katër komunat me shumicë serbe në veri të Kosovës është e qetë dhe aktualisht nuk ka indikacione për rrezik të sigurisë, tha zëvendësdrejtori i Policisë së Kosovës për rajonin e veriut, Veton Elshani.
“Për momentin nuk ka rrezik për sigurinë, por ne jemi këtu që të reagojmë nëse paraqitet”, u tha Elshani gazetarëve.
Ai tha se Policia ka përgatitur një plan operativ dhe nuk do të lejojë “provokime” nga asnjëra anë e urës mbi lumin Ibër, që ndan Mitrovicën e Jugut, me shumicë shqiptare, nga Mitrovica e Veriut, me shumicë serbe.
Elshani tha se Policia ka zhvilluar takime me KFOR-in, EULEX-in, Agjencinë e Kosovës për Inteligjencë dhe institucione të tjera të sigurisë.
“Nuk ka indikacione se mund të ketë ndonjë rrezik për sigurinë”, tha ai.
LDK-ja shpreh “shqetësim të thellë” për aktgjykimin, bën thirrje për qetësi
Lidhja Demokratike e Kosovës tha se e ka pritur me “shqetësim shumë të thellë” aktgjykimin ndaj ish-krerëve të UÇK-së dhe përmasën e dënimeve të shqiptuara ndaj tyre.
Në reagimin pas aktgjykimit, LDK-ja bëri thirrje për qetësi, maturi dhe përgjegjësi, ndërsa kërkoi që të shfrytëzohen të gjitha mundësitë ligjore për kundërshtimin e vendimit.
“Mbështesim pa rezervë kërkesën për shterimin e të gjitha kanaleve ankimore, përfshirë edhe ato të shkallës së dytë”, thuhet në reagim.
LDK-ja tha se asnjë aktgjykim nuk mund ta ndryshojë, sipas saj, “të vërtetën historike të luftës në Kosovë”, ndërsa theksoi se UÇK-ja mbetet pjesë e rëndësishme e historisë moderne të vendit.
Partia u bëri thirrje gjithashtu përfaqësuesve politikë që të shmangin retorikën që mund të nxisë tensione dhe forcave politike që të lënë mënjanë ndasitë.
“Ta ruajmë Kosovën, unitetin qytetar dhe miqësitë që i qëndruan pranë në rrugën drejt lirisë e pavarësisë”, thuhet në reagimin e LDK-së.
BE-ja bën thirrje për përmbajtje pas aktgjykimit ndaj ish-krerëve të UÇK-së
Bashkimi Evropian u ka bërë thirrje të gjitha palëve dhe aktorëve në Kosovë dhe në rajon që të tregojnë përmbajtje pas aktgjykimit ndaj Hashim Thaçit, Kadri Veselit, Rexhep Selimit dhe Jakup Krasniqit.
Në një deklaratë për Radion Evropa e Lirë, zëdhënësi i BE-së, Guillaume Mercier, tha se Dhomat e Specializuara dhe Zyra e Prokurorit të Specializuar duhet të lejohen ta ushtrojnë mandatin e tyre pa ndërhyrje.
“Drejtësia duhet të lejohet të ndjekë rrjedhën e saj - gjë që është veçanërisht e rëndësishme për viktimat. Autoritetet kanë përgjegjësinë të garantojnë sigurinë e të gjitha komuniteteve dhe banorëve në mbarë Kosovën”, tha Mercier.
BE-ja tha se “merr shënim” aktgjykimin e shkallës së parë dhe vlerësoi se Dhomat e Specializuara po administrojnë drejtësi përmes procedurave “të drejta, të paanshme dhe të pavarura”, të bazuara në parimin e përgjegjësisë penale individuale.
Mercier rikujtoi se personat e dënuar kanë të drejtë ta apelojnë aktgjykimin para një paneli të veçantë të gjyqtarëve të Apelit.
BE-ja ritheksoi, gjithashtu, mbështetjen e saj për Dhomat e Specializuara, duke kujtuar se ato u krijuan me vendime të Kuvendit të Kosovës më 2014 dhe 2015 dhe funksionojnë brenda sistemit juridik të Kosovës.
Sipas BE-së, puna e tyre është e rëndësishme për përgjegjësinë penale dhe drejtësinë për viktimat dhe familjet e tyre nga të gjitha komunitetet në Kosovë, si dhe për pajtimin.
“Është thelbësore të promovohet një mjedis pa frikë dhe hakmarrje dhe të mbrohen viktimat dhe dëshmitarët”, tha Mercier për REL-in.