SHBA-ja: Respektojmë aktgjykimin ndaj ish-krerëve të UÇK-së
Shtetet e Bashkuara thanë se e respektojnë aktgjykimin e Dhomave të Specializuara ndaj Hashim Thaçit, Kadri Veselit, Jakup Krasniqit dhe Rexhep Selimit dhe u bënë thirrje të gjitha palëve që ta pranojnë vendimin e gjykatës.
“Ne e respektojmë aktgjykimin e sotëm të Dhomave të Specializuara të Kosovës”, tha një zëdhënës i Departamentit amerikan të Shtetit për Radion Evropa e Lirë.
Departamenti i Shtetit tha se SHBA-ja mbështet drejtësinë për të gjitha viktimat dhe familjet e tyre dhe ritheksoi mbështetjen për llogaridhënien, procesin e rregullt ligjor dhe sundimin e ligjit.
Uashingtoni bëri thirrje, gjithashtu, për shmangien e retorikës nxitëse pas shpalljes së aktgjykimit.
“U bëjmë thirrje të gjitha palëve që ta respektojnë vendimin e gjykatës, të shmangin retorikën nxitëse dhe të vazhdojnë të punojnë drejt një të ardhmeje paqësore dhe demokratike”, tha zëdhënësi i Departamentit të Shtetit.
Lajmi i plotë:
West: Vendimi i sotëm i rëndësishëm për sundimin e ligjit dhe drejtësinë për viktimat
Prokurorja e Specializuara, Kimberly West, tha se e mirëpret aktgjykimin dënues ndaj katërshes së UÇK-së, duke thënë se ai është i rëndësishëm për sundimin e ligjit në Kosovë dhe “drejtëi të vonuar për viktimat”.
“Gjykata ka konfirmuar se asnjë individ, pavarësisht rangut apo autoritetit politik, nuk është mbi ligjin dhe nuk ka imunitet nga përgjegjësia për krime të rënda ndërkombëtare”, tha West, sipas një njoftimi për media.
Sipas saj, ZPS-ja “nuk ka ndjekur penalisht UÇK-në” dhe as “luftën e bërë për pavarësinë e Kosovës”.
“Individë të caktuar shfrytëzuan ato rrethana të luftës për të kryer krime të rënda, dhe është për meritë të Kosovës që këta individë nxirren tani para përgjegjësisë”, tha West.
Prokurorja West po ashtu tha se ZPS-ja do të shqyrtojë të gjithë aktgjykimin në ditët në vijim, përfshirë pikat e aktakuzës për krime kundër njerëzimit “që nuk çuan në dënime”.
Asnjë vendim lirues nga Specialja
Përveç dënimit të Thaçit, Krasniqit, Veselit dhe Selimi, deri më tani Gjykata Speciale në Hagë ka marrë edhe vendime të tjera për akuza për krime lufte dhe për pengim të drejtësisë.
Aktakuza e parë në këtë gjykatë u konfirmua në vitin 2020, ndërsa asnjëri nga gjykimet e deritanishme nuk kanë qenë lirues për të akuzuarit.
Kjo është lista e aktgjykimeve të kësaj gjykate që nga nisja e punës së saj:
- Më 14 dhjetor 2023, Salih Mustafa, ish-eprori i UÇK-së, u dënua me 22 vjet burgim për krime lufte.
- Më 14 korrik 2025, Pjetër Shala, ish pjesëtar i UÇK-së, u dënua me 18 vjet burgim për krime lufte.
- Më 2 shkurt 2023, Nasim Haradinaj dhe Hysni Gucati nga Organizata e Veteranëve të Luftës të Ushtrisë Çlirimtare, u dënuan me nga katër vjet e tre muaj burgim për pengim të drejtësisë.
- Më 4 shkurt 2025, Haxhi Shala u dënua me tre vjet burgim, ndërkaq Sabit Januzi dhe Ismet Bahtijari me nga dy vjet për pengim të drejtësisë.
Pas protestës para EULEX-it, qytetarët mblidhen në qendër të Prishtinës
Pas shpalljes së aktgjykimit, dhjetëra qytetarë protestuan para selisë së EULEX-it, në zonën industriale. Disa prej tyre hodhën gurë në drejtim të ndërtesës.
Tani, dhjetëra qytetarë po protestojnë në qendër të Prishtinës, përfshirë para ndërtesës së Qeverisë së Kosovës.
Më poshtë ju sjellim pamje nga protesta para selisë së EULEX-it:
