Protestuesit hedhin gurë në drejtim të ndërtesës së Qeverisë
Disa qytetarë kanë hedhur gurë në drejtim të ndërtesës së Qeverisë së Kosovës në qendër të Prishtinës.
Protestë e ngjashme u mbajt paraprakisht para selisë së EULEX-it, në zonën industriale, kur u hodhën gurë në drejtim të ndërtesës së Misionit të BE-së për Sundim të Ligjit.
Protestat vijnë pasi Dhomat e Specializuara në Hagë i dënuan katër ish-krerët e UÇK-së për krime lufte, me dënime që shkojnë nga 13 deri në 25 vjet burgim.
Kroacia: Vendimi në Hagë nuk e ndryshon kontekstin e luftës
Ministria e Punëve të Jashtme e Kroacisë ka reaguar ndaj vendimit dënues për krime lufte ndaj katër ish-krerëve të UÇK-së nga Gjykata Speciale në Hagë.
Në llogarinë zyrtare në X, MPJ e Kroacisë theksoi se nuk do që ta paragjykojë epilogun e vendimit që është marrë në shkallë të parë.
“Ky vendim nuk e ndryshon kontekstin historik të luftës në Kosovë apo faktin se Kosova dhe popullsia e saj ishin viktima të represionit dhe krimeve të rënda nga regjimi i Millosheviqit”, thuhet në reagim.
MPJ-ja kroate shtoi se përgjegjësia individuale e një personi “nuk mund të shërbejë si bazë për relativizimin e atyre krimeve apo për vënien në dyshim të lirisë dhe pavarësisë së Kosovës”.
Më poshtë mund të lexoni detaje të vendimit ndaj ish-krerëve të UÇK-së:
Fondi dhe REKOM: Faktet për krimet nuk mund të mohohen, Serbia duhet t’i ndjekë penalisht komandantët e lartë
Tre organizata për të drejtat e njeriut – Fondi për të Drejtën Humanitare (FDH) në Serbi, Fondi për të Drejtën Humanitare Kosovë (FDHK) dhe Rrjeti i Pajtimit REKOM – thanë se aktgjykimi i shkallës së parë ndaj katër ish-krerëve të UÇK-së ka vërtetuar fakte që nuk mund të mohohen për shkak të narrativës mbizotëruese në Kosovë mbi luftën çlirimtare të UÇK-së.
Në një deklaratë të përbashkët, organizatat thanë se aktgjykimi dokumenton vende ndalimi, tortura, vrasje dhe zhdukje të serbëve, romëve dhe shqiptarëve të Kosovës – përfshirë anëtarë të LDK-së, persona pa angazhim politik, si dhe pjesëtarë e përkrahës të UÇK-së.
Ato theksuan se etiketimi i viktimave si “kolaboracionistë” nuk mund të justifikojë rrëmbimin, torturimin apo vrasjen e tyre. Njëkohësisht, organizatat e cilësuan të arsyeshëm pakënaqësinë në Kosovë për mungesën pothuajse të plotë të ndjekjes penale në Serbi të oficerëve të lartë të Ushtrisë Jugosllave dhe policisë serbe për krimet ndaj shqiptarëve të Kosovës.
Gashi: Pavarësisht vendimit, katërshja e UÇK-së mbeten çlirimtarë të Kosovës
Kryetari i Kuvendit të Maqedonisë së Veriut, Afrim Gashi, tha se katërshja e UÇK-së, pavarësisht vendimit dënues, “mbeten çlirimtarë të Kosovës”.
“Aktgjykimi i sotëm është i shkallës së parë, ndërsa beteja për drejtësi vazhdon”, shkroi ai në rrjetet sociale.
Gashi bëri thirrje për qetësi, teksa theksoi se Thaçi, Krasniqi, Veseli dhe Selimi “i përkasin një kapitulli të lavdishëm të historisë së Kosovës”, duke shtuar se asnjë vendim gjykate nuk mund ta mohojë këtë.
“Për popullin shqiptar, ata janë dhe mbeten çlirimtarë të Kosovës. Lufta e UÇK-së, sakrifica dhe vetëmohimi i atyre që e udhëhoqën dhe ishin pjesë e saj janë vetë rruga që çoi në lirinë e Kosovës dhe në një epokë të re paqeje e stabiliteti në rajon”, shkroi ai.
