Aleanca kërkon votimin e ligjit
Deputeti i Aleancës, Bekë Berisha, u bëri thirrje deputetëve që të mblidhen në Kuvend dhe t’i votojnë në lexim të dytë ndryshimet në Ligjin për Dhomat e Specializuara.
“Deputetët duhet të vijnë në Kuvend dhe ta votojnë ligjin. Kjo është përgjegjësia jonë”, tha Berisha në një konferencë për gazetarë.
Ramush Haradinaj, po nga Aleanca, tha se nuk ka marrë ndonjë ftesë për seancë të Kuvendit, pavarësisht raportimeve se gjatë ditës mund të thirret një e tillë.
Më pas, ai dhe deputetë të tjerë të Aleancës dolën para Kuvendit për t’i përshëndetur dhe falënderuar, siç tha, protestuesit që po kërkojnë votimin në lexim të dytë të ndryshimeve në Ligjin për Dhomat e Specializuara.
“Jemi një me çlirimtarët”, u tha Haradinaj protestuesve.
Abdixhiku mbron qëndrimin e LDK-së: Etiketimet nuk na e ndryshojnë bindjen
Kryetari i Lidhjes Demokratike të Kosovës, Lumir Abdixhiku, mbrojti qëndrimin e partisë së tij për zhvillimet rreth ish-krerëve të UÇK-së dhe Ligjit për Dhomat e Specializuara, një ditë pasi deputetët e LDK-së nuk morën pjesë në votimin e projektligjit për ndryshimin e këtij ligji.
“UÇK-ja është edhe gjaku ynë. Me Amerikën e NATO-n na lidh vetë liria. Asnjë tregtari patriotizmi nuk ia lejojmë ta përvetësojë historinë që e bëmë bashkë”, shkroi Abdixhiku në Facebook.
Ai tha se LDK-ja nuk do ta ndryshojë qëndrimin për shkak të kritikave apo presionit.
“Etiketimet nuk na e ndryshojnë bindjen. Kërcënimet nuk na e përcaktojnë qëndrimin”, shkroi ai.
LDK-ja ishte e vetmja nga partitë e mëdha parlamentare që nuk mori pjesë në votimin e 5 tetorit për projektligjin për ndryshimin e Ligjit për Dhomat e Specializuara.
Projektligji kaloi në lexim të parë me 91 vota për, pa vota kundër apo abstenime.
Para votimit, LDK-ja tha se nuk mund ta mbështeste nismën, duke ngritur pikëpyetje nëse ndryshimet e propozuara mund të prodhonin efekt juridik.
Sipas qëndrimit të saj, aktgjykimet duhet të sfidohen përmes rrugës gjyqësore dhe procesit të apelit.
Në postimin e së martës, Abdixhiku nuk tha se LDK-ja e ka ndryshuar këtë qëndrim.
Ai argumentoi se, po të ishte ndjekur qasja e LDK-së, Kosova tashmë do ta kishte zgjedhur presidentin dhe do të kishte angazhim institucional për, siç tha ai, “mbrojtjen e së vërtetës së luftës tonë në botë”.
“Ja ku mbetëm sot. Pa institucione, pa mundësi mbrojtjeje, pa kohezion minimal në vend”, shkroi Abdixhiku.
Hamza: Nuk ka takim me Kurtin pa u votuar ligji në lexim të dytë
Kryetari i Partisë Demokratike të Kosovës, Bedri Hamza, tha se nuk do të ketë takim të ri me kryeministrin Albin Kurti, derisa Kuvendi të votojë në lexim të dytë ndryshimet në Ligjin për Dhomat e Specializuara.
“Për ne ligji është domosdoshmëri. Ligji dhe presidenti nuk janë çështje të lidhura”, tha Hamza para gazetarëve.
“Le të votohet ligji, pastaj jemi të hapur të bisedojmë për tema të tjera”, shtoi ai.
Hamza tha se qëndrim i përbashkët i PDK-së është që të thirret seanca e Kuvendit dhe projektligji të hidhet në votim, duke argumentuar se nuk ekziston asnjë pengesë procedurale, ligjore apo politike që kjo të ndodhë.
PDK-ja është iniciuese e ndryshimeve ligjore, të cilat u miratuan në lexim të parë më 5 tetor.
Hamza tha se iniciativa lidhet me atë që PDK-ja e konsideron padrejtësi ndaj ish-krerëve të Ushtrisë Çlirimtare të Kosovës të dënuar në Hagë.
“Ne nuk jemi kundër drejtësisë, por ata janë njerëz të pafajshëm”, tha Hamza, duke e cilësuar gjetjen për ndërmarrje të përbashkët kriminale si “goditje për Kosovën”.
“Na dënohet historia, na dënohet e tashmja dhe e ardhmja e vendit tonë”, tha ai.
Më herët, partia e tij, përmes një postimi në rrjetet sociale, i bëri thirrje kryetares së Kuvendit, Albulena Haxhiu, që të thërrasë me urgjencë seancën plenare për përmbylljen e miratimit të ligjit që, siç tha, “mbron UÇK-në, çlirimtarët dhe historinë tonë”.
Duke folur për protestat në Prishtinë, Hamza tha se protestuesit po kërkojnë drejtësi dhe respektimin e të drejtave të njeriut, si dhe miratimin e ndryshimeve ligjore.
Ai kritikoi mënyrën se si policia ndërhyri gjatë përplasjeve të një dite më parë, duke e cilësuar përdorimin e forcës si joproporcional.
“Përdorimi i forcës joproporcionale shkakton zemërim, shkakton skena të panevojshme, shkakton acarim të masës”, tha Hamza.
Ai bëri thirrje për kujdes nga institucionet dhe protestuesit, në mënyrë që të shmangen tensionet dhe dhuna.
“Nuk dua të besoj që ato do të përsëriten”, tha Hamza.
Hamza komentoi edhe kërkesën që ushtruesja e detyrës së presidentit, Albulena Haxhiu, i ka dërguar Gjykatës Kushtetuese për të sqaruar ushtrimin e kompetencave presidenciale pas përfundimit të periudhës gjashtëmujore.
Sipas Hamzës, Gjykata Kushtetuese tashmë e ka bërë të qartë se 6 tetori është dita e fundit për zgjedhjen e presidentit.
“Nuk pres që Gjykata Kushtetuese të dalë përtej afateve”, tha ai.
Nis protesta në Prishtinë, kërkohet votimi i ligjit në lexim të dytë
Në Prishtinë nisi protesta në mbështetje të ndryshimeve në Ligjin për Dhomat e Specializuara, një ditë pasi tubimi i së hënës u përshkallëzua në përplasje mes protestuesve dhe policisë.
Njëri nga organizatorët, Çlirim Haziri, u bëri thirrje deputetëve që ta votojnë projektligjin në lexim të dytë, duke paralajmëruar vazhdimin e protestave nëse kjo nuk ndodh.
“Ose votojeni ligjin, ose dilni në zgjedhje me ‘vulën e turpit’”, tha Haziri para protestuesve.
“Derisa ligji të votohet, ne nuk e bëjmë asnjë hap prapa”, shtoi ai.
Haziri iu drejtua gjithashtu deputetëve me fjalët: “Kjo masë do t’ju ndjekë si hije, sepse kush luan me themelet e kombit, nuk do të gjejë paqe”.
Projektligji u miratua në lexim të parë më 5 tetor, por votimi në lexim të dytë mbetet i papërfunduar.