Hamza: Kurti nuk ka marrëveshje me PDK-në për presidentin
Hamza iu përgjigj më pyetjeve lidhur me kërkesën e Kurtit për zgjedhjen e Bekim Sejdiut president të ri të Kosovës.
Ai tha se, megjithëse nuk ka “vërejtje” për Sejdiun, kandidatura e tij vjen nga një marrëveshje mes Vetëvendosjes dhe Lidhjes Demokratike të Kosovës (LDK).
“Nuk është marrëveshje me PDK-në, është marrëveshje me një subjekt tjetër politik”, tha Hamza.
Ai e kritikoi Kurtin se dëshiron të shkaktojë “hutim” me ofertat e tij.
“Dhe i patë lajmet, që veç është hajt të flasim, të shesim mjegull. As nuk kam vërejtje personale, e as politike në raport me Sejdiun. Po, është marrëveshje jashtë tavoline me PDK-në. Nëse keni marrëveshje me LDK-në, bëjeni”, shtoi ai.
Hamza i përgjigjet Kurtit: Qëndrimi i PDK-së nuk ndryshon
Kryetari i Partisë Demokratike të Kosovës, Bedri Hamza, ka thënë se partia e tij vazhdon të mbajë qëndrim të njëjtë se së pari duhet të kalojnë edhe në lexim të dytë ndryshimet e propozuara në ligjin për Gjykatën Speciale të Kosovës në Hagë.
Duke folur në një konferencë për media pas ofertës së Kurtit për votimin e Bekim Sejdiut për president fillimisht, para kalimit të ndryshimeve në ligjin në fjalë, Hamza tha se kërkesa e tyre nuk mund të lidhet me zgjedhjen e presidentit të ri.
“Për ne, radha e gjërave është e qartë. Kemi thënë: së pari ligji në dy leximet”, tha Hamza.
Ai e ka cilësuar ofertën e Kurtit si “detyrim”.
“Nuk ishte ofertë, por një lloj detyrimi. Pa marrëveshje, pa bisedime, ‘ejani votojeni këtë kandidat, ky është kandidati, m’i sillni votat’”, tha Hamza kur u pyet për ofertën.
Ai tha se “për shkak të projektit politik të Vetëvendosjes vendi po shkon në zgjedhje”.
“Do të jetë kosto për qytetarët e Kosovës dhe Kosovën. E keqja është se kanë bërë veprime të qëllimshme dhe planifikuara, pa dashur rezultat. Nuk kanë pasur qëllim t’i kalojnë ndryshimet në ligj në dy lexime”, theksoi Hamza.
Murati lë të kuptohet se Sejdiu s’është kthyer në garën për president
Hekruan Murati, deputeti i partisë në pushtet Lëvizja Vetëvendosje, ka lënë të kuptohet se juristi dhe diplomati Bekim Sejdiu, nuk është rikthyer në garën për president të Kosovës.
Në një reagim në Facebook ndaj raportimeve të mediave se Sejdiu ka rikonfirmuar tërheqjen nga gara, Murati tha se “lë të thotë Bedri Hamza PO, dhe sigurisht që me Prof. Bekim Sejdiun mund të shkojnë e flasin Kurti e Abdixhiku për ta bindur që të mos shkojë vendi në zgjedhje të reja”.
Sejdiu ishte kandidat i një marrëveshjeje mes Vetëvendosjes së kryeministrit Albin Kurti dhe Lidhjes Demokratike të Kosovës dhe u tërhoq muajin e kaluar, pasi gjashtë deputetë të LDK-së kundërshtuan garimin e tij.
Sipas raportimeve në mediat vendase, Sejdiu ka thënë se nuk është rikthyer në garë.
Radio Evropa e Lirë po bën përpjekje për ta kontaktuar Sejdiun për koment.
Kurti tha të martën se, nëse PDK-ja zotohet se jep të paktën gjysmën e votave për zgjedhjen e Sejdiut, partia e tij do t’ia kalojë ndryshimet e propozuara në ligjin për Gjykatën Speciale të Kosovës në Hagë.
Kurti kishte thënë edhe ditë më parë se Sejdiu vazhdonte të mbetej kandidat për president.
LVV i drejtohet Kushtetueses për sqarim lidhur me kompetencat presidenciale pas skadimit të mandatit
Partia në pushtet, Lëvizja Vetëvendosje, i është drejtuar Gjykatës Kushtetuese për të kërkuar sqarime se kush mund t’i ushtrojë kompetencat presidenciale pas përfundimit të mandatit gjashtëmujor të ushtrueses së detyrës së presidentit, Albulena Haxhiu, nëse Kuvendi nuk arrin ta zgjedhë presidentin e ri.
Kërkesa është dërguar nga deputeti Adnan Rrustemi në emër të 31 deputetëve nënshkrues.
“Kërkesë drejtuar Gjykatës Kushtetuese për zgjidhjen e konfliktit ndërmjet kompetencave kushtetuese të Kuvendit të Republikës së Kosovës dhe të presidentit të Republikës së Kosovës, në lidhje me ushtrimin e kompetencave presidenciale të domosdoshme për vazhdimësinë institucionale dhe procesin zgjedhor pas përfundimit të periudhës gjashtëmujorë të ushtrimit të detyrës së presidentit, në mbështetje të nenit 113(3)(1) të Kushtetutës”, thuhet në letrën e dërguar nga Rrustemi.
Paraprakisht, edhe vetë Haxhiu i ishte drejtuar Kushtetueses me kërkesë të njëjtë.
Afati për zgjedhjen e presidentit të ri mbaron sonte në mesnatë.
