Justina Shiroka Pula zgjidhet presidente e Kosovës

Komunikimi mes kryeministrit të Kosovës, Albin Kurti, dhe kryetarit të Partisë Demokratike të Kosovës (PDK), Bedri Hamza, tashmë po zhvillohet përmes konferencave për media.

Hamza e ka hedhur poshtë edhe ofertën e dytë të kryeministrit Albin Kurti për kalimin e ndryshimeve në ligjin për Gjykatën Speciale dhe zgjedhjen e presidentit në një seancë këtë mbrëmje.

Pak kohë më parë, Kurti tha se partia e tij do t’i kalojë në lexim të dytë ndryshimet e propozuara nga PDK-ja në ligjin për Gjykatën Speciale qysh sonte, nëse ajo ia voton partisë në pushtet Glauk Konjufcën ose Feride Rushitin për president të ri të Kosovës.

Hamza iu përgjigj tani duke thënë se “kjo nuk është aspak serioze”.

“Kjo temë po tentohet të shndërrohet në pazare të minutave të fundit”, shtoi Hamza.

Sipas tij, Kurti dëshiron “autoritet të plotë” mbi institucionet kryesore të Kosovës.

“Qëllimi është si ta përdorë ligjin thjesht dhe direkt për shantazh për ta arritur qëllimin politik për ta pasur një president politik dhe për ta përmbyllur plotësisht kapjen e institucioneve të shtetit”, tha ai.

Hamza tha se për herë të fundit ka komunikuar me Kurtin sot në mesditë, kur e ka njoftuar se për Partinë Demokratike të Kosovës “duhet të kalojë ligji leximin e dytë dhe pastaj mund flasim dhe të kemi marrëveshje për presidentin”.

Kryetari i Partisë Demokratike e Kosovës (PDK), Bedri Hamza, pritet të dalë pas pak në konferencë për media pas ofertës së dytë që kryeministri Albin Kurti i bëri për votim të ligjit për Gjykatë Speciale nëse kjo parti garanton votën për president.

Këtë e konfirmoi për Radion Evropa e Lirë deputeti i kësaj partie Mërgim Lushtaku.

“Shumë shpejt del kryetari i partisë dhe jep sqarimin për këtë çështje”, tha Lushtaku.

Kryeministri Albin Kurti i ka bërë ofertë të re Partisë Demokratike të Kosovës (PDK) në mbrëmjen e 6 tetorit.

Kreu i Lëvizjes Vetëvendosje (LVV) ka thënë se partia e tij do t’i kalojë në lexim të dytë ndryshimet e propozuara nga PDK-ja në ligjin për Gjykatën Speciale qysh sonte, nëse ajo ia voton partisë në pushtet Glauk Konjufcën ose Feride Rushitin për president të ri të Kosovës.

Kurti ka shprehur gatishmërinë që LVV-ja ta votojë ligjin për Specialen, para se të procedohet me votimin për presidentin e ri të Kosovës.

“Pra, ne ua votojmë projektligjin për Gjykatën Speciale paraprakisht e mandej sonte menjëherë votimi për president, Glauku ose Feridja”, tha Kurti.

Ai tha se, nëse PDK pranon, partia e tij do ta thërrasë seancën e Kuvendin me dy pika: votimi i projektligjit për Gjykatën Speciale në lexim të dytë dhe zgjedhja e presidentit të ri të republikës.

Radio Evropa e Lirë po bën përpjekje për ta kontaktuar PDK-në për koment.

Në prill, Glauk Konjufca dhe Feride Rushiti ishin kandidatët për president nga partia në pushtet, por Kuvendi nuk arriti ta zgjedhë ndonjërin pasi opozita braktisi sallën.

Pas dështimit të procesit të zgjedhjes së presidentit, Kosova shkoi në zgjedhje të parakohshme më 7 qershor.

Sa për t’jua kujtuar, nevojitet prania e të paktën 80 deputetëve në Kuvendin me 120 vende që votimi për president të jetë i vlefshëm.

Oferta e dytë e Kurtit vjen kur kanë mbetur më pak se katër orë deri në përfundim të afatit kushtetues për zgjedhjen e presidentit të ri.

Paraprakisht, PDK-ja ia hodhi poshtë një oferët Kurtit për votimin e Bekim Sejdiut për president fillimisht, para kalimit të ndryshimeve në ligjin në fjalë.

Komisioni i Pavarur i Mediave (KPM) u ka bërë thirrje mediave në vend për raportim të përgjegjshëm dhe profesional në një kohë kur në vend po zhvillohen protesta dhe kur situata publike është veçanërisht e ndjeshme.

KPM-ja, e cila është organ i pavarur përgjegjës për rregullimin, menaxhimin dhe mbikëqyrjen e spektrit të frekuencave të transmetimit në Kosovë, tha në një komunikatë në Facebook se në raportimin e tyre, mediat duhet të udhëhiqen nga parimet e saktësisë, paanshmërisë, profesionalizmit, verifikimit të fakteve dhe përgjegjësisë ndaj publikut.

“Në situata të tilla, roli i medias është veçanërisht i rëndësishëm. Publiku ka nevojë për informacion të saktë, të verifikuar dhe të kontekstualizuar, e jo për raportime që mund të shkaktojnë konfuzion, tensione të panevojshme apo polarizim të mëtejshëm të shoqërisë”, thuhet në njoftim.