American Express pezullon operacionet në Rusi dhe Bjellorusi
Kompania American Express tha të dielën se do të pezullojë të gjitha operacionet në Rusi dhe Bjellorusi, duke iu bashkuar një numri korporatash perëndimore që po tërheqin biznesin e tyre nga Rusia, pasi Moska nisi pushtimin e Ukrainës.
“Në dritë të sulmit të pajustifikueshëm të Rusisë ndaj popullit të Ukrainës, American Express pezullon të gjitha operacionet në Rusi”, tha kjo kompani e kartave të kreditit përmes një deklarate të postuar në ueb-faqe.
“Ne po ashtu do të ndalojmë të gjithë operacionet biznesore në Bjellorusi”, shtoi kjo kompani.
American Express i bashkohet kompanive Visa dhe Mastercard dhe PayPal, që njoftuan po ashtu se kanë pezulluar operacionet në Rusi për shkak të luftës në Ukrainë.
Protesta në Rusi kundër luftës në Ukrainë
“Jo luftës” dhe “Turp ju qoftë”, ishin disa prej sloganeve në protestat e mbajtura në 53 qytete ruse. Mijëra qytetarë kundërshtuan luftën e Rusisë në Ukrainë. Sipas autoriteteve, mbi 3,500 persona u arrestuan gjatë protestave të 6 marsit.
Aeroporti i Vinistias i shkatërruar plotësisht
Më herët gjatë ditës kemi raportuar se presidenti i Ukrainës, Volodymyr Zelensky, tha se si pasojë e sulmeve me raketa nga Rusia, aeroporti i Vinistias është shkatërruar plotësisht.
Sipas tij, ky aerport që gjendet në perëndim të Ukrainës, u sulmua me tetë raketa.
Më poshtë mund të shikoni disa fotografi nga ky aeroport:
OKB e alarmuar me zhvillimet në centralin bërthamor të kontrolluar nga forcat ruse
Ukraina e ka informuar Agjencinë Ndërkombëtare për Energji Bërthamore (ANEB) se menaxhmenti në centralin bërthamor Zaporizhja është nën urdhrat e komandantit të forcave ruse, që po e kontrollojnë këtë objekt.
Drejtori i Agjencisë Ndërkombëtare për Energji Bërthamore, Rafael Grossi, tha se është “jashtëzakonisht i shqetësuar” lidhur me zhvillimet e fundit.
Sipas udhëzimeve të sigurisë së ANEB-it, personeli operativ “duhet të jetë në gjendje të përmbushë detyrat e tij të sigurisë dhe të ketë kapacitet që të marrë vendime pa presion”.
Grossi tha se situata që Ukraina ka raportuar për centralin në Zaporizhja ishte në “kundërshtim” të këtij udhëzimi, që sipas ANEB-it është një prej “shtatë shtyllave të domosdoshme të sigurisë bërthamore”.
ANEB, që është agjenci e Kombeve të Bashkuara, po ashtu tha se rregullatori bërthamor ukrainas i ka thënë kësaj agjencie se po ka probleme të komunikojë me stafin që operon centralin në Zaporizhja, që bie ndesh po ashtu me një nga shtyllat e kësaj agjencie.
Lajmin e plotë mund ta lexoni KËTU