Lexues të nderuar, nëse tani jeni kyçur në blogun tonë rreth luftës në Ukrainë, këto janë më të rejat e fundit:
- Moska nuk e ka respektuar armëpushimin për evakuimin e civilëve nga dy qytete ukrainase
- Ukraina tha se të hënën mbahet rundi i tretë i bisedimeve me Rusinë. Temë e diskutimeve do të jenë: armëpushimi dhe hapja e korridoreve humanitare
- Presidenti rus, Vladimir Putin, tha se nëse NATO krijon një zonë të ndalim-qarkullimit mbi Ukrainën, kjo do të shihej si “pjesëmarrje në konflikt të armatosur”
- Kryeministri i Izraelit, Naftali Bennett, u takua në Moskë me presidentin rus, Vladimir Putin, me të cilin bisedoi për situatën në Ukrainë. Më pas ai zhvilloi edhe një bisedë me presidentin ukrainas, Volodymyr Zelensky.
- Sekretari amerikan i Shtetit, Antony Blinken, vizitoi refugjatët ukrainas në kufirin midis Ukrainës dhe Polonisë. Ai premtoi se Uashingtoni do të ofrojë 2.75 miliardë dollarë ndihmë për refugjatët
- Sipas Kombeve të Bashkuara mbi 1.3 milion persona janë larguar që prej se Rusia nisi pushtimin e Ukrainës më 24 shkurt
Eksodi i ukrainasve
Dhjetë ditë pas nisjes së pushtimit rus të Ukrainës, ukrainasit vazhdojnë të ikin nga vendi i tyre. Bazuar në shifrat e Kombeve të Bashkuara, gati 1.37 milion njerëz janë larguar nga Ukraina që nga 24 shkurti, kur ndodhi sulmi i parë mbi Ukrainë.
Eksodi i ukrainasve
Turqia dhe SHBA-ja do të koordinojnë përgjigjen ndaj luftës në Ukrainë
Turqia dhe Shtetet e Bashkuara mbesin “në koordinim të ngushtë” teksa po punojnë për zgjidhjen diplomatike të pushtimit rus të Ukrainës, tha Ministria e Jashtme e Turqisë pas bisedimeve që zhvilluan të shtunën zëvendësministrat e Jashtëm të dy shteteve.
Në deklaratën pas bisedimeve midis zëvendësministrit të Jashtëm turk, Sedat Onal, dhe nënsekretares amerikane të Shtetit, Wendy Sherman, në Ankara, Ministra e Jashtme turke tha se aleatët “kanë konfirmuar mbështetjen e tyre për sovranitetin dhe integritetin territorial të Ukrainës”.
“U theksua rëndësia e të qenit në koordinim të ngushtë për të menaxhuar ndikimet e shumanshme të krizës dhe për të mbështetur një zgjidhje diplomatike”, u tha në deklaratë dhe u shtua se dy zyrtarët biseduan edhe për raportet dypalëshe.
“U konfirmua vullneti i përbashkët për të thelluar bashkëpunimin dypalësh përmes një dialogu të qëndrueshëm dhe të institucionalizuar dhe u theksua se pavarësisht mospajtimeve të vazhdueshme për disa çështje, Turqia dhe Shtetet e Bashkuara kanë një agjendë të gjerë pozitive”, u tha në deklaratë.
Lajmin e plotë mund ta lexoni KËTU
Bombardimet vazhdojnë në qytetet ukrainase
Në disa qytete të Ukrainës po raportohet për bombardime nga ushtria ruse.
Më poshtë mund të mësoni se në cilat qytete është raportuar për bombardime në 24 orët e fundit
- Bombardime të rënda janë raportuar në Irpin, qytet në periferi të Kievit.
- Bombardimet po vazhdojnë në qytetin jugor të Mariupolit, pavarësisht se në këtë qytet ishte planifikuar që një marrëveshje e armëpushimit t’iu mundësonte evakuimin banorëve. Por, kjo marrëveshje nuk u respektua nga Rusia
- Gjatë natës është raportuar për granatime të ashpra në Harkiv dhe Sumi
- Luftime të ashpra janë raportuar të shtunën në veriperëndim të Kievit dhe përreth aeroportit Hstomel
- Forcat ruse po vazhdojnë përpjekjet e tyre për ta rrethuar kryeqytetin ukrainas, Kiev, që së bashku me Harkivin, vazhdojnë të jenë nën kontrollin e Ukrainës, pavarësisht bombardimeve të rënda.