Kush e përbën rrethin e ngushtë të Putinit?
Presidenti rus, Vladimir Putin është duke drejtuar ushtrinë e Rusisë në një luftë të rrezikshme në Ukrainë që kërcënon të shkatërrojë ekonominë e shtetit.
Ai rrallë është parë më i izoluar sesa në kohët e fundit, pasi shihet i ulur në distanca të mëdha edhe me këshilltarët më të afërt.
Si komandant i përgjithshëm, përgjegjësia për pushtim bie mbi të, mirëpo ai gjithmonë është mbështetur në një rreth besnik, pjesëtarët e të cilit po ashtu kanë nisur karrierat në shërbimet ruse të sigurisë, sipas transmetuesit britanik, BBC.
Pyetja është se kush e ka vëmendjen e tij në një prej momenteve më të rëndësishme të presidencës?
Për më shumë lexoni këtu.
Lufta në Ukrainë mund të zgjasë disa muaj
Konflikti në Ukrainë do të zgjasë me muaj, nëse jo vite, thotë zëvendëskryeministri i Mbretërisë së Bashkuar Dominic Raab.
Ai tha për Sky Neës se aleatët duhet të tregojnë “qëndrueshmëri strategjike” për të siguruar që presidenti i Rusisë, Vladimir Putin, të dështojë.
Afër 1 milion refugjatë ukrainas vetëm në Poloni
Autoritetet polake kanë njoftuar se rreth 922,440 refugjatë nga Ukraina kanë kaluar në Poloni që nga fillimi i pushtimit rus më 24 shkurt.
Vetëm të shtunën, 129,000 njerëz kaluan kufirin, njoftuan autoritetet kufitare, ndërsa të dielën në mëngjes, rreth 39,800 hynë ukrainas në Poloni.
Sipas të dhënave nga Ministria e Jashtme polake, shumica e refugjatëve janë shtetas ukrainas, megjithëse janë regjistruar edhe shtetas të Uzbekistanit, Bjellorusisë, Indisë, Nigerisë, Algjerisë, Marokut, SHBA-së dhe disa vendeve të tjera.
Derisa komisioneri i lartë i OKB-së për refugjatët, Filippo Grandi, tha se në dhjetë ditët e fundit – që nga fillimi i pushtimit rus më 24 shkurt - më shumë se 1.5 milion njerëz kanë ikur nga Ukraina dhe kanë kaluar në vendet fqinje.
Sipas OKB-së, kjo është kriza më në rritje e refugjatëve në Evropë që nga Lufta e Dytë Botërore.
Në Rusi arrestohen më shumë se 300 protestues kundër luftës në Ukrainë
Policia në Rusi ka arrestuar 316 persona, të cilët kanë protestuar në 16 qytete të ndryshme në të gjithë Rusinë, kundër luftës në Ukrainë, ka njoftuar OVD, një organizatë joqeveritare që monitoron represionin politik.
Deri më tash, policia nuk ka dhënë asnjë koment lidhur me arrestimet.